UTSJOEN KUNTA
PL 41
99981 UTSJOKI
Puhelin 040-188 6111
Fax 016-677 339
Kunnanvirasto ja puhelinvaihde avoinna 9.00 - 15.00
Utsjoen kunta
 

Birra

Ohcejotnjálmmi skuvla, Deanu Suoma bealde, ja Sirpmá skuvla, Deanu Norgga bealde, leat guhkit áigge juo bargan ovttas. Ovttasbargu lea nannen sámegielat ohppiid giella- ja kulturmáhtu ja maiddái sin sámi identitehta. Ohcejoga ja Deanu gielddat barget maiddái ovttas mánáidgárde-/ beaiveruoktofálaldagas , nu ahte mánát sáhttet oažžut sámegielat mánáidgárdefálaldaga nuppi riikkas. Dát ovttasbarggut leat leamaš hui earenoamáš Sámis, ja maiddái Norgga ja Suoma gaskkas. Sámi, Norgga ja Suoma eiseválddit hálidit eambbo sámi skuvlaovttasbarggu , ja dát ovttasbarggut sáhttet leat buorre modeallan ja ovdamearkan eará skuvllaide ja mánáidgárddiide.

 

INTERREG-prošeavtta bokte mii hálidit nannet ja viiddidit sámi skuvla- ja mánáidgárdeovttasbarggu Deanuleagis. Earret eará áigut ovddidit Deanuleagi sámi oahppoplána ja bajásgeassinplána, ovddidit sámegielat oahpponeavvuid ja doarjut oahpaheddjiid ja eará bargiid fágalaččat sihke bagadallama ja skuvlejumi bokte. Ovttas Sámi allaskuvllain áigut čađahit čielggadeami rájáhis giellaskuvlla ja giellamánáidgárddi birra, ja sihkkarastit ahte gielddaid ovttasbargu šaddá bistevažžan go prošeakta nohká. Geahča muđui dán čilgehusa oasi doaimmaid birra. Geahča maiddái prošeavtta INTERREG-skovi, mas ee. čilgejuvvojit prošeavtta bohtosat.

 

 

Ohcejoga gielda lea prošeavtta váldoohcci. Mielohccin leat Deanu giellaguovddáš ja Deanu gielda. Ovttasbargoguoimmit leat earret eará Sirpmá ja Ohcejotnjálmmi skuvllat, Ohcejoga ja Deanu mánáidgárddit, Sámi Siida rs ja Sámi allaskuvla.

 

Prošeaktaáigi lea 1.11.2009 – 31.12.2013. Prošeavtta ruhtadeaddjit leat Davvikalohttaráđđi, Lappi leanaráđđehus, Norgga Sámediggi, Norgga Bargo- ja searvadahttindepartemeanta, Ohcejoga gielda, Deanu gielda, Deanu giellaguovddáš ja INTERREG-Sápmi (EU ja Norgga bealde).