Deanuleahki bovde sihkkelasti: Teno Outdoor -prošeakta lea vuolgán johtui

5.8.2022

Teno Outdoor -prošeakta lea vuolgán johtui. Prošeavtta ulbmilin lea ovddidit Deanuleahkái vásttolaš mátkkošteapmái laktáseaddji bálvalusollisvuođaid, main váldodeaddu lea sihkkelastin- ja luondomátkkošteamis. Prošeavttain viggat lasihit Ohcejoga dovddusvuođa máŋggabealat luondomátkkoštančuozáhahkan.

Prošeakta lea oaivvilduvvon erenoamážit báikkálaš fitnodatdolliide, geaid háliidat mielde oččodit fierpmádagaid ja ideaid ja ollašuhttit ođđalágan mátkkoštanbálvalusaid luossabivddu báldii. Ovttasbargu fitnodatdolliid gaskkas lea dehálaš, vai Deanugeainnu johtolat ja bálvalusat mat leat geavahusas dan guoras, livčče juohke sihkkelasti ja luonddumátkkálačča olámuttos álkit.  Buot sihkkelastin- ja luondomátkkošteami ovddideamis beroštuvvan fitnodatdoallit ja doaibmit leat buresboahtin mielde.

Teno Outdoor -prošeavttas čiekŋut erenomážit sihkkelastimii Deanugeainnu alde. Suomas vástideaddjilágan dovddus sihkkelastinvuojáhagat leat ovdamearkka dihte Saimaa suologuovlluvuojáhat (Saimaan saaristoreitti) ja Suologuovllu riekkesgeaidnu (Saariston rengastie).

Sihkkelastinmátkkošteamis olbmuid beroštahttá eret eará luonddus leahkin, fearánvuoigŋa ja sihkkelastima dearvvašvuođaváikkuhusat. Lassin sihkkelastinmátkkošteapmi doarju vásttolaš mátkkošteami prinsihpaid, dasgo dat lea dálkkádatustitlaš lagasmátkkošteapmi. Sihkkelastinmátkkošteami bivnnutvuohta leage lassánan hui ollu maŋimuš jagiid áigge, mii oidno lassánan bálvalusjearaldahkan.

Prošeavttas čielggaduvvo, mo Deanugeainnus sáhtášii dahkat sihkkelastái vel eanet geasuheaddji čuozáhaga, ja danin mii boahtit váldit oktavuođa báikkálaš fitnodatdolliide ja ságastallat fáttás áračavčča áigge. Lassin mii bovdet fitnodatdolliid ja gielddalaččaid roahkkadit ja iešráđálaččat muitalit sihkkelastinmátkkošteapmái laktáseaddji ideaid ja sávaldagaid. Boađe mielde!

Prošeakta nohká juovlamánus 2023.

Lassedieđut ja oktavuođaváldin:

Meri Luoma
Prošeaktahoavda
040 500 1081
meri.luoma@utsjoki.fi

Sonja Sistonen
Vásttolašvuođa- ja gulahallanáššedovdi
040 635 9277
sonja.sistonen@utsjoki.fi


Eará ođđasat