Beaiváduvvon koronarávvagat ja -ávžžuhusat Ohcejoga gielddas – ođđa rávvagat earret eará skuvllaide ja árrabajásgeassimii

Beaiváduvvon 17.8.2021

Dán siiddus oainnát koronavirusepidemiija dihte Ohcejoga gildii addojuvvon ráddjehusaid, ávžžuhusaid ja rávvagiid, mat beaiváduvvojit epidemiijadili mielde.

Rávvagat skuvllaide ja árrabajásgeassimii

Sihke beaiveruovttuin ja skuvllain leat ain anus muhtun spiehkastatdoaimmat, maiguin lea ulbmil sihkkarastit dorvvolaš skuvlavázzima ja árrabajásgeassima sihke mánáide ja bargiide. Spiehkastatdoaimmain, hygieniija beavttálmahttimis ja fysalaš kontávttaid garvimis fuolakeahttá lea dehálaš maid sihkkarastit, ahte mánná oažžu doarvái lagasvuođa, dorvvu ja vuorrováikkuhusa.

  1. Skuvlii ja árrabajásgeassimii ii galgga mannat, jos leat dávdamearkkat
    Koronavirus dagaha vuoiŋŋahatinfekšuvnna, man dávdamearkkat sáhttet leat ee. gosahat, čottabávččas, feber, deahkkebákčasat, vuoigŋanváttisvuođat, čoavjeváttut ja oaivebávččas. Jos mánás dahje bargis leat infekšuvdnamearkkat, ii son galgga mannat skuvlii dahje beaiveruktui. Jos mánná buohccá beaivvi áigge, son sirrejuvvo dakkaviđe eará latnjii vuordit fuolaheaddji. Jos olbmos leat dávdamearkkat, ávžžuhuvvo son fitnat koronaiskosis, rávvagiid áiggivárremii gávnnat dáppe. Erenoamážit olbmot, geat bohtet epidemiija jođálmuvvan- ja leavvanmuttuid guovlluin, ávžžuhuvvojit váldit koronaiskosa buotlágan dávdamearkkain. Árrabajásgeassimii dahje skuvlii sáhttá máhccat, jos dávdamearkkat eai šat leat dahje dat leat hui láivvit, ja koronateasta lea negatiiva. Jos olbmos lea čielgasit nuorvvu, ii skuvlii dahje beaiveruktui galgga mannat, vaikko teasta livččege negatiiva.
  2. Buorre giehta- ja gossanhygieniija
    Sihke mánát ja ollesolbmot basset gieđaideaset álo go bohtet skuvlii dahje beaiveruktui ja ovdal go vulget ruoktot. Lassin gieđat bassojuvvojit čáziin ja sáibbuin álo ovdal boradeami, álo olggos sisa boađedettiin, álo gossama dahje gastima maŋŋá ja álo dalle, go gieđat leat čielgasit duolvasat.
  3. Dorvogaskkat
    Beaiveruovttuin ja skuvllain doaimmat lágiduvvojit nu buorre gaskkaiguin go vejolaš.
  4. Joavkkuid sirren
    Vuolle- ja badjeskuvllaid ja logahaga oahppijoavkkut dollojuvvojit vejolašvuođaid mielde sierra. Skuvllaid boradeamit ja gaskadiimmut lágiduvvojit vejolašvuođaid mielde vurrolágaid.
  5. Iežas dávvirat ja čorgen
    Dávvirat leat nu unnán go vejolaš oktasaš geavahusas ja dat buhtistuvvojit álo guđege geavaheaddji maŋŋá. Lanjat, beavddit ja eará bajildusat buhtistuvvojit ain beaktilabbot go dábálaččat.
  6. Skuvlasáhtuin lea máskaávžžuhus, oahppiide leat máskkat skuvlatáksiin.
  7. Vánhemiideahkediin váldojuvvojit vuhtii dorvogaskkat ja geavahuvvojit máskkat. Jos dorvogaskkaid ii leat vejolaš doallat (omd. ii gávdno doarvái stuorra sadji), lea vánhemiideahkediid ávžžuhus doallat gáiddusin Teams bokte.
  8. Bargoveaga siskkáldas čoahkkanemiin galgá fuolahit dorvogaskkain ja eará hygieniijarávvagiin. Jos dorvogaskkaid ii leat vejolaš doallat, lea ávžžuhus geavahit máskka.
  9. Skuvlla ja árrabajásgeassima dáhpáhusat ja reaissut
    Dáhpáhusaid ja reaissuid sáhttá epidemiijadili mielde lágidit, go čuovvu almmolaš hygieniijarávvagiid. Skuvllaid dáhpáhusain iešguđet oahppijoavkkut dollojuvvojit sierra, jos vejolaš. Skuvllas dahje árrabajásgeassimis sáhttet fitnat galledeaddjit doaisttážii dušše Lappi buohccedikšunbiirre dahje Deanuleagi guovllus. Galledeaddjiid ávžžuhit fitnat koronaiskosis 24 diimmu siste ovdal galledeami. Jos galledeaddji lea fidnen guktuid boahkuid, testen ii leat dárbbašlaš. Jođánis teastta lea vejolaš válddihit Ohcejoga dearvvasvuođaguovddážis, rávvagiid áiggevárremii gávnnat dáppe. Galledeaddjit geavahit galledeami áigge máskka.

Dáhpáhusat ja čoahkkaneamit

Lappi buohccedikšunbiirres eai leat dán dilis fámus čoahkkananráddjehusat. Vejolaš čoahkkanemiid ja dilálašvuođaid gusket goit ain njoammudávdalága hygieniijarávvagat, omd. vejolašvuohta buhtistit gieđaid, dorvvolaš gaskkaid doallan ja lanjaid ja bajildusaid beaktilot buhtisteapmi. Jos dorvogaskkaid ii leat vejolaš doallat, ávžžuhit geavahit máskka. Dáhpáhusain lea dehálaš maid sihkkarastit doarvái buorre gaskka ovdanbukti ja geahččiid gaskii.

Dáhpáhusaid galgá lágidit vásttolaččat ja dain galgá čuovvut addojuvvon hygieniijarávvagiid.

Gielddadállu

Ohcejoga gielddadálu ovdauksa lea gitta, muhto uvssas lea nummir, masa riŋgemiin sáhtát dikšut gielddadálus áššiid dego dábálaččat, árgabeivviid dmu 9–15.

Eará almmolaš rávvagat

Rájárasttildeapmi

Áiggedását rávvagiid rájárasttildeapmái koronapandemiija áigge gávnnat rádjegozihanlágádusa neahttasiiddus.

 

Gávnnat lasi dieđuid guovllu koronavirusdilis ja Ohcejoga koronatestemiin ja -boahkohemiin gieldda koronasiiddus.


Muita uutisia