Ohcejoga gielddas lea ordnejuvvon mánáide árrabajásgeassin Ohcejohnjálmmis, Gáregasnjárggas ja Njuorggámis. Árrabajásgeassima bálvalusaid oažžu davvisámegillii ja suomagillii dan mielde, mii máná eatnigiella lea. Beaiveruovttuin ordnejuvvo maiddái davvisámegiel giellabeassedoaibma. Dat lea giellalávgunmálle, mii ealáskahttá ja nanne unnitlogugiela.

Ohcejogas leat golbma skuvlla: Ohcejohnjálmmi, Gáregasnjárgga ja Njuorggán skuvllat. Buot golbma skuvla-máŋggadoaimmadálu visttit leat ođđasat, ja dain leat dearvvasvuođa dáfus dorvvolaš ja ođđaáigásaš sajit oahppiide ja bargiide. Buot skuvllain lea oahpahus sáme- ja suomagillii. Vuođđooahpahusa lassin skuvllain ordnejuvvojit máŋggalágan riekkesdoaimmat.

Ohcejoga sámelogahat lea EU davimus logahat ja seammás davimus nuppi dási oahppolágádus.  Logahat lea doaibman gielddas jo badjel njealljelot jagi. Ohcejoga sámelogahagas sáhttá čađahit dábálaš logahaga oahppomeari. Buot kurssat oahpahuvvojit suomagillii, muhto oahppi sáhttá lohkat maiddái sámegiela ja muhtin kurssaid sámegillii.

Logahat figgá fállat nu máŋggabealat oahppoáigodagaid ja kursafálaldagaid go lea vejolaš. Iežas fálaldat dievasmahtto dárbbu mielde gáiddusoahpahusain. Kursafálaldagaide leat gieskat lasihan ođđa kurssaid, mat leat huksejuvvon sámevuođa ja davviguovlluid temáid birra. Dat ovttas sámegielkurssaiguin fállet viiddes davvi oahppoollisvuođa. Turku universitehtain ordnejuvvojit oktasaš allaskuvlavahkut, main Geavu dutkamušstašuvdna lea guovddážis. Duppal- dahje golmmageardándutkosa čađaheapmi lea vejolaš ovttasráđiid earret eará Sámi oahpahusguovddážiin, mii lea Anáris.