Ohcejogas lea Suoma ja oppa EU davimus logahat! Ohcejoga sámelogahat lea doaibman juo badjel 40 jagi, jagi 1977 rájes. Min logahat lea uhcci ja doppe lea buorre vuoigŋa.
Ohcejoga sámelogahagas sáhttá čađahit normála logahaga oahppomeari. Buot gurssaid oahpahus addojuvvo suomagillii, muhto stuđeanttas lea vejolašvuohta stuđeret maid sámegiela ja muhtun gurssaid sámegillii. Sámegielas sáhttá čađahit stuđeantaiskosa jogo eatnigiela dahje oanehis vieris giela oahppomeari mielde.
Logahaga ulbmilin lea fállat nu viidát oahpuid go vejolaš. Sáhtát oahpásmuvvat logahaga oahppoplánii dáppe.
Iežas oahppoosiid válljemiid sáhttá dievasmahttit dárbbu mielde gáiddusoahpahusain. Logahagas sáhtát stuđeret sápmelašvuođa ja davvi temáid birra huksejuvvon oahppoosiid, mat ovttas sámegiela gurssaiguin fállet viidát davvi temáid gieđahalli oahppoollisvuođa. Duppaldutkosa dahje golmmaoasat dutkosa čađahanvejolašvuohta lea ordnejuvvon ovttas Sámi oahpahusguovddážiin, mii lea Anáris.
Logahat bargá ovttas earet eará Ohcejogas doaibmi Turku universitehta Geavu dutkanstašuvnnain, Lappi universitehtain ja Luondduriggodatguovddážiin (LUKE). Oktasašbargu ordnejuvvo maid rájá rastá Norgii ja eará guovlluide máilbmái.
Sámekultuvra eallá nanusin Ohcejogas. Giela gullá beaivválaččat, ja lassin gilis lea máŋggabealat sámegielat kulturdoaibma. Sámi oahpahusguovddáš ordne Ohcejogas sámi árbevirrui laktáseaddji gurssaid, nugo musihka ja sámeduoji gurssaid, mat dohkkehuvvojit maiddái logahaga heivehuvvon gursan.
Guhkkelis boahtti stuđeanttaide leat fállun oahpuid áigái logahaga iežas juogaduvvon lanjadagat.
