ASP-loatna – ovddut vuosttas vistti oastái
24.4.2025
Dihtetgo, ahte ASP-seastima sáhttá álggahit vel 44-jahkásažžan ja ASP-lotnii oaččut máŋggaid ovdduid go veardida dábálaš vistelotnii?
ASP-vuogádat dahjege visteseastinbuhtadusvuogádat heive sutnje, guhte oastá iežas vuosttas ruovttu. Dat lea loatnavuogádat, man stáhta doarju ja man ulbmilin lea dahkat álkibun vuosttas vistti oastima.
– ASP-kontui seastin vehá dego simulere loana máksima, ja mun ávžžuhan dan buohkaide, geaidda ASP-konttu rahpan lea vejolaš, movttiidahttá Pohjola OP báŋkohoavda Tero Kasanen.
ASP-konttu sáhttá rahpat 15-44 -jahkásaš, guhte ii leat árabut oamastan visttis dahje giddodagas 50 % dahje eanet. ASP-loana sáhttá ohcat, go lea seastán ASP-kontui unnimustá 150 euro gávcci jahkenjealjádasa áigge. ASP-lotnii reahkká 10 % iežasruhtadanoassi. Go rahpá konttu, ii dárbbaš diehtit makkár vistti háliida oastit dahje vistti oastima áiggi – badjeahkerádji guoská dušše konttu rahpama, ii loana váldima.
– ASP-loanas leat máŋggat buorit bealit. Dat eaktuda seastima, ja dasa lea vejolaš oažžut stáhtadáhkádusa deavdit vejolaš dáhkádusváilli. Jos áššehas lea seastán 10 % vistti hattis ja hatti dáhkádusárvu lea Nordeas 75 % hattis, 15 % báhcá dáhkádusa váili. Dán sáhttá gokčat stáhtadáhkádusain. Stáhtadáhkádus buktá lotnii dihto lasseeavttuid, ovdamearkan 25 jagi eanemuslotnaáiggi, Nordea Davvi Suoma doaibmajođiheaddji Jussi Makkonen muitala.
ASP-loana ovddut
Nuvttá stáhtadáhkádus lea dárbbašlaš iešvuohta sutnje, guhte oastá vuosttas vistti ja geas ii leat dáhkádussan heivvolaš opmodat. Stáhtadáhkádus sáhttá leat eanemustá 25 % loanas.
ASP-loanas leat unna iežasruhtadanoasi lassin maiddái eará ovddut. Das lea unnit marginála go vástideaddji eará vuosttas vistti oasti loanas. Loanas lea maiddái nuvttá reantodoarjja vuosttas 10 jagi áigge. Dan oažžu, jos loana reantu manná badjel 3,8 %. Dalle reantodoarjja lea badjelmanni oasis 70 proseanta.
ASP-kontui mákso jahkásaš 1 % reantu, mii lea eanetgo dábálaš geavahankonttu reantu. Kontui oažžu máhccevaš 4 proseantta lassereanttu vurkema álggahanjagis ja čuovvovaš viđa jagis, go ASP-loatna loktejuvvo iežas ruovttu háhkama váráš.
ASP-loatna heive nu vistti oastimii go huksemiige
ASP-loana eanemusmeari mearrida gielda. Ohcejogas dat lea 140 000 euro, jos vistti oastá okto. Guokte ASP-seasti olbmo sáhttiba oažžut oktiibuot 210 euro lotnii.
ASP-loanain lea maiddái vejolaš hukset iežas ruovttu. Huksedettiin geavahuvvojit vuos ASP-konttu rájut ja loatna loktejuvvo dan mielde, go huksen ovdána. ASP-konttu lassereanttu oažžu, go visti lea gárvvis.
ASP-seastin heive bures iežas ruovttus easkka niegadeaddji olbmui
ASP-konttu rahpan ja dohko seastin ii čana masage. Olbmos sáhttá leat dušše okta ASP-kontu, muhto dan sáhttá dárbbu mielde sirdit báŋkkus nubbái. Guokte ASP-seasti olbmo sáhttiba oastit oktasaš vistti ASP-loanain, go goabbáge oastá visttis 50 %.
Seastimis sáhttá doallat bottu, daningo gávcci jahkenjealjádasa vurkemat eai dárbbaš leat dahkkon maŋŋálas jahkenjealjádasain. Konttu sáhttá dárbbu mielde heaittihit ja geavahit ruđaid eará áššiide – muhto dalle lassereanttu ii oaččo, ja 1 % máksojuvvon reanttus ferte máksit 30 % gáldovearu. ASP-konttu sáhttá rahpat ođđasit, jos rahpama eavttut ain divvet.
Njuovžilvuođa dihte ASP-seastin heive buohkaide geat devdet eavttuid ja sávvet, ahte muhtumin sáhttet oastit alcceseaset ruovttu.
Loga lasi ASP-konttus ja -loanas čujuhusain ja raba ASP-konttu čujuhusain
https://www.valtiokonttori.fi/palvelut/rahoitus-ja-lainapalvelut/asp-saastaminen-ja-asp-laina/
https://www.op.fi/henkiloasiakkaat/paivittaiset/tilit/asp-tili
Artihkal lea almmustahtton Ráhkadusnuppástus koordinašuvdna Ohcejogas -prošeavtta buvttusin.