Davvi-Lappi gielddat álggahit guovlluguovdasaš oahppoloatnabuhtadusiskkadallama
3.9.2025
Iskkadallamis ohcat čovdosiid mo buoridit máhtolaš bargofámu fidnema hárvvet ássojuvvon guvlui, ja seammás stáhtahálddahus oažžu dieđu iskkadallamis.
Anára, Soađegili ja Ohcejoga gielddat álggahit guovlluguovdasaš oahppoloatnabuhtadusiskkadallama, mas fállojuvvo oahppoloatnabuhtadus daidda olbmuide, geat čađahit allaskuvladutkosa ja geat barget hárvvet ássojuvvon guovllus. Mearreáigásaš iskkadallan ordnejuvvo jagiid 2026–2028. Dán sullasaš iskkadallan ii leat ovdal ollašuhtton Suomas.
Iskkadallama ulbmilin lea movttiidahttit máhtolaš bargofámu fárret ja sajáiduvvat Anára, Soađegili ja Ohcejoga gielddaide ja doarjut aiddo válmmaštuvvan olbmuid njuovžilis čatnaseami bargoeallimii.
Jurdda oaččui álggu Davvi-Lappi guovloovttasbarggu gielddaidovttastumi ovddugohcinmátkkis Helssegis.
– Mii háliidit iskkadit oahppoloatnabuhtadusa addima, daningo mis lea dasa roahkkatvuohta ja vejolašvuohta, iige dán hálddahuslaččat njuolga mihkkige eastte. Álgagiid dahkamiin sáhttit dahkat buori Davvi-Lappi eallinvuoibmái, barggolašvuhtii ja guovllu bisuhanfápmui. Dát lea ovttaskas olbmo ja gielddaid ovdamunni, muitala Soađegili gielddahoavda Jari Rantapelkonen.
Jurdda ovdánii mearrideami várás Davvi-Lappi guovloovttasbarggu gielddaidovttastumi stivrii, man miehtemielalaš oainnu maŋŋá sihke Anára, Soađegili ja Ohcejoga gielddaráđđehusat leat čájehan iskkadallamii ruoná čuovgga.
Iskkadallamiin čielggaduvvojit oahppoloatnabuhtadusa ovdamunit
Oahppoloatnabuhtadusiskkadallamis ohccojuvvojit vuogit máhtolaš bargofámu oažžuma buorideapmin ja bisuhanfámu nannemii hárvvet ásson guovllus. Seammás ohcat čovdosiid mat sihkkarastet gielddaid lágas mearriduvvon bargguid ja ovddidit ealáhusdoaimma go veahkadatráhkadus nuppástuvvá ovddežis.
– Davvi-Lappi dárbbaša lasi bargiid. Dál lea maid vuogas áigi giktit davás bargofámu, go máddelis Suomas aiddo válmmaštuvvan olbmuin lea heajos bargodilli. Buoremus dáhpáhusas iskkadallan fállá čovdosiid buot beliide, muitala Davvi- ja Nuorta-Lappi barggolašvuođaguovllu hoavda Kaija Kukkola.
Iskkadallamis čielggaduvvojit movttiidahttima vejolaš váikkuhusat doarjut skuvlejuvvon ámmátbargiid ásaiduvvama ja sajáiduvvama Davvi-Lappii. Dát fállá ovtta molssaeavttu olmmošlogu geahppáneapmái ja boarásmuvvamii go doarjut sihke ruovttoluotta fárrema ja áibbas ođđa báikái ásaiduvvama. Ávžžuhus guoská olbmuid, geat leat loahpahan oahpuideaset ja seammás arvvosmahttá maid ođđasis skuvlet iežas.
Guovlluguovdasaš oahppoloatnabuhtadus iskkadallojuvvo mearreáigásažžan jagiid 2026-2028. Iskkadallannjuolggadusain lea ráddjehus fámus orrumii, muhto seammás galgá iskkadallama ulbmil leat dan mađe guhkki ahte oažžut luohtehahtti bohtosiid. Guovlo- ja gieldadutkanguovddáža Spatia ja Láhkaásahandutkamuša dutkanjoavkku ovdačielggadeami vuođul Suomas livččii sáhttán álggahit guovlluguovdasaš oahppoloatnabuhtadusa iskkadallan juo jagi 2022.
– Iskkadallan lea áidna vuohki oažžut čielgasa guovlluguovdasaš oahppoloatnabuhtadusa váikkuhusas ja stivrenváikkuhusas, daningo ovddalgihtii ii leat diehtu oahppoloatnabuhtadusa váikkuhusain loahpalaš oaivilii fárret. Buorre, ahte gielddain gávdnui miella ovdagáttuid hága vuolgit iskkadallat dán ášši. Dákkára Suopma dárbbaša, árvala Anára gielddastivrra ságadoalli Janne Tervahauta.
Easka válmmaštuvvan olbmuin lea beroštupmi Lappii
Guovlluguovdasaš oahppoloatnabuhtadusiskkadallama ovdačielggadeamis deattuhuvvui Lappi geasuhanfápmu. Sullii guokte goalmmádas universitehtaoahppiin ja golbma njealjis ámmátskuvlaoahppis árvvoštalai ahte livčče gearggus fárret hárvvet ássojuvvon guvlui.
Geasuhanfápmun – beroštahtti ja skuvlejumi vástideaddji barggu lassin – lea earet eará luonddulagaš eallin ja ráfálaš ássanbiras ja maiddái hálbbes orrungolut.
– Erenomážit dálá máilmmiviidosaš dilis ja dorvvolašvuođa oainnuid vuhtii válddedettiin Suoma rádjeguovllut ja davviguovllut galget adnojuvvot ássanbáikin. Dat gáibida, ahte sihkkarastojuvvo gielddaid vuođđobálvalusaide ja ealáhusdoaimma dárbbuide bargofápmu mii lea skuvlejuvvon ja mas lea motivašuvdna, muitala Ohcejoga gielddastivrra ságajođiheaddji Vuokko Tieva-Niittyvuopio.
Mo geavatlaččat čađahuvvošii iskkadallan?
Oahppoloana buhtadus lea dárkkuhuvvon sutnje gii áiddo lea geargan oahpuin ja gean ruovttugieldan lea leamaš unnimusat 12 mánotbaji iskkadallanguovllu gielda. Gáiddusbargu dahje johtin hárvvet ásson ássanguovllu olggobealde barggus gullá buhtadusa vuollái.Maiddái fitnodatolbmuide sáhttá máksit buhtadusa. Dat mii lea bargi ruovttugielda váikkuha leago sus vuoigatvuohta oažžut dán buhtadusa.
– Mii váldit vuostá iskkadallama roahkkadit ja beroštumiin. Geavatlaš vásáhusain oažžut dehálaš dieđu prošeavtta detáljaid viidáset ovddideami várás ja erenomážit dieđu stáhtahálddahusa várás, loahpaha Davvi-Lappi guovloovttasbarggu gielddaidovttastumi doaibmajođiheaddji Reija Viinanen.
Loga lasi: Guovlluguovdasaš oahppoloatnabuhtadusiskkadallama ovdačielggadus http://urn.fi/URN:ISBN:978-952-61-4460-3
Beroštuvvetge? Jeara lasi!
Reija Viinanen
Doaibmajođiheaddji
Pohjois-Lapin alueyhteistyön kuntayhtymä
0400 423 370
reija.viinanen@sodankyla.fi