Dearvvuođat Gávcci jagiáiggi dáhpáhusat -fidnus
15.9.2025
Dál go geasseluomut leat meattá ja leat máhccagoahtán bargguide, lea buorre dilli muittašit makkár áššiid leat ožžon áigái Gávcci jagiáiggi dáhpáhusat -fitnu áigge.
♦ Jagi 2024 cuoŋománus fidnu čálii searveáššegirjji ja vuosttas searveveahkkeruđat juhkkojuvvojedje Ohcejoga gielddas.
♦ Miessemánus fidnu ordnii ortnetfáktaskuvlejumi, masa serve 18 movttáskan olbmo.
♦ Geassemánus ordnejuvvui Davi gievrramus -gilvu Ohcejohnjálmmi skuvlla šiljus. Gilvui serve 31 gilvaleaddji.
♦ Ohcejohka Šearrá -kulturvahkku ordnejuvvui suoidnemánu vuosttas vahkus 1.–7.7.2024
- 4.7. Geassebeaivi Gáregasnjárggas ovttas Gáregasnjárgga giliservviin. Mielde ledje maiddái Taidevirta-ovttasbargoprošeavtta studeanttat Lappi universitehtas.
- 4.7. Sámegiel diktafestivála Buolbmátjávrris
- 5.7. Mu ráhkis Ohcejohka -festivála Gieddemiellis ja báikkálaš nuoraid hutkkus ja Mihkku Laiti jođihan Loktafeasta Hotel Ohcejogas.
- 6.7. Sámegiel filbmafestivála Gáregasnjárggas ovttasráđiid filbmaguovddáš Skábma:in.
♦ Suoidnemánus 2024 fidnu lei mielde lágideamen Kaldoaivi Ultra Trail Junior event -dáhpáhusa.
♦ Čakčamánus ordnejuvvojedje Mihkalmas márkanat Ohcejoga kirkostobuin.
♦ Jagi 2024 áigge ollašuhttui viiddis dáhpáhusollisvuohta Ándarasas Árktalaš áigevánddardeapmái ovttasráđiid Ohcejoga Ursa rs:iin. Dáhpáhusollisvuhtii gulai buohkaide rabas Ándaras Kitti 180-jagi ávvovahku dáhpáhusat Njuorggámis, Gáregasnjárggas ja Ohcejohnjálmmi skuvllas. Ohcejoga Ursa rs ordnen prográmma lei oaidnimis maiddái Ohcejohka Šearrá -kulturvahku áigge suoidnemánus 2024. Čakčat 2024 ordnejuvvojedje vel skuvlenbeaivvit Turku luonddusuodjalanjovkui ja Helssega kultursajiid jođiheaddjiide ja golggotmánus ordnejuvvojedje vel skuvlalaččaide iežas beaivvit gomuvuođavahku gudnin.
♦ Čakčat 2024 Gávcci jagiáiggi dáhpáhusat -fitnu ja Lappi universitehta ovttasbargoprošeakta Taidevirta nogai .Prošeavtta áigge juohke gilis dahkkojedje álbmotdáiddaduojit, mat báhce čábbudahttit gielddaolbmuid ja turisttaid árgabeivviid.
♦ Juovlamánus 2024 ordnejuvvui hygienapássaskuvlejupmi, man čađahedje 18 olbmo.
♦ Jahki molsašuvai ja jagi 2025 álggaheimmet 6.2. Sámi álbmotbeaivvi ávvudoaluiguin Gáregasnjárggas. Dáhpáhus ordnejuvvui ovttasbarggus Badje-Deanu sámit -servviin.
♦ Guovva-njukčamánu doajáldagas beasaimet návddašit Boazo cup:as Ohcejogas 20-jagi bottu maŋŋá! Guokte beaivvi bistán gilvvohallamiid eahketprográmmas olbmuid ledje guoimmuheamen Article 3 ja Felgen Orkester
♦ Cuoŋománus dahkkui oahppomátki Heahtá musihkabeivviide Guovdageidnui.
♦ Miessemánus ordnejuvvojedje etniidbeaivvimárkanat Gáregasnjárgga gilidálus ovttas Gáregasnjárgga giliservviin.
♦ Geassemánus 2025 Davi gievrramus -gilvu devddii 5 jagi!
♦ Utsjoen Lumo lea dás ovddos Ohcejohka Šearrá -kulturfestivála. Kulturfestivála prográmma lei vuot lágiduvvon juohke gillái:
- 3.7. Sámegiel diktafestivála ordnejuvvui Buolbmátjávrris jo nuppe háve
- 4.7. Geassebeaivi Gáregasnjárggas -dáhpáhusasge beasaimet jo nuppášii návddašit
- 5.7. Ohcejohka Šearrá -festivála huksejuvvui Gieddemiellái.
- 6.7. Njuorggán geassedáhpáhusa prográmmas lei teáhter, magiija ja olympialaččaid viđakámpa. Dáhpáhusa ordnejedje Tenon voima ja dáhpáhusa doarjjui ruđalaččat MLL.
♦ Suoidnemánus 2025 ordnejuvvui vel Biitsiä 24h -dáhpáhuspilohta, mas spáppa doško birra jándora.
Go ná logahallat doaluid, de sáhttit oaidnit ahte miihan leat geargan vuoikko ja maid 1,5 jagi áigge. Giitu buohkaide geat serve dáhpáhusaid ordnenbargguide ja erenomážit háliidat giitit buohkaid din, geat galledeiddet dáhpáhusaid! Guđemuš doalut báhce buoremusat millii?
Na, maid čuovvovaččat? Prošeakta nohká juovlamánus 2025. Loahppajagi áigge ordnejuvvo vel dáhpáhusordnema oanehisskuvlejupmi, mii lea oaivvilduvvon servviide, olbmuide ja eará doaibmiide, geat ordnejit dáhpáhusaid Ohcejoga guovllus. Skuvlema gilvalahttin lea vel gaskan. Dan lassin prošeavtta bokte ráhkaduvvojit dáhpáhusrávvagat, mii báhccá buot gieldalaččaid, dáhpáhusaid ordnejeaddjiid ja earáid atnui, geat leat beroštuvvan ordnet dáhpáhusaid.
Gávcci jagiáiggi dáhpáhusat leat Ohcejoga gieldda astoáiggedoaimma prošeakta, man lea ruhtadan Leader Pohjoisin Lappi. Prošeavtta ulbmilin lea nannet goalmmát sektora doaimmaid Ohcejoga gielddas, ovdánahttit doaluid mat jo leat ja lasihit dáhpáhuspilohtaid bokte iešguđetlágan doaluid Ohcejoga gielddas.
