Doarjaga oljoliggenvuogis luohpamii geargá velá ohcat

Leago du ruoktu okta dain viesuin Ohcejogas, gos lea geavahusas oljoliggenvuogádat? Leago oljoliggenrusttet jo geavahanagi loahpas ja smiehtat, maid de galggašii dahkat? Dál lea buorre áigi luohpat oljoliggenvuogis, dasgo dađe várás doarjja dállodoaluide lea velá oanehis botta oažžumis.

– Go vástideaddji doarjagat eai leat boahtimin, dál gánneha doibmet, jos ášši lea áigeguovdil, muitala Tuuli Pohjola Davvi-Suoma Energiijarávven bálvalusas.

Oljoliggenvuogis luohpamii dárkkuhuvvon doarjja lea farga nohkamin, ja ohcamušaid galgá guođđit maŋimustá dál giđđat 2025. ELY-guovddáža mieđihan doarjaga eaktun lea, ahte dát liggenvuogi ođadanbargu galgá leat gárvvis 31.8.2025.

-Ohcamušat leat boahtán valjis, muhto mearreruhta dađe várás lea ain oažžumis. Ohcamušat gieđahallojit govttolaš áiggis, nu ahte energiijavuogi ođadanbarggu geargá bures velá ollašuhttit, go guođđá ohcamuša farggamusat, ávžžuha Pohjola.

Doarjaga sturrodat mearrašuvvá ođđa liggenvuogi mielde

Oljoliggenvuogi sadjái gávdnojit máŋggat molssaeavttut, geavahusas dábálamosit leat eanaliggenpumppat ja áibmočáhceliggenpumppat ja gáiddusliekkas. Jos sirdašuvvá dáidda ovddabealde namuhuvvon energiijavugiide doarjja mieđihuvvo 4000 euro.

Vejolaš molssaeavttut leat maid elrávdnji, ferkkohat, boaldenmuorat ja pellet. Jos sirdašuvvá dáidda liggenvugiide, doarjaga lea vejolaš oažžut 2500 euro.

– Jos smiehttá Ohcejoga dálkkádaga de ruđalaččat áibmočáhceliggenpumppa ii vealtameahttumit gánnet bidjat, daningo ruosti buollašis dát liggenvuogádat álgá geavahit elrávnnji liggemii. Elrávdnjeliggen ja áibmoliggenpumppa kombinašuvdna dan sadjái sáhtášii leat doaibmi čoavddus unnit viesuin, oaivvilda Pohjola.

-Áinnas, jos eanaliggen ja dan ollašuhttin tonttes lea vejolaš, dan guhkit áigegaskka doaibmagolut bohtet hálbbibun, Pohjola joatká.

Doarjaga mieđiheapmi eaktuda, ahte dán seamma ášši várás ii oaččo eará doarjagiid dahje dállodoallogeahpádusa. Doarjaga ii oaččo, jos ođđa liggenvuogádat geavaha biogása dahje -oljju dahje fossiila boaldámuša. Doarjja ii mieđihuvvo astoáiggeviesuid energiijavugiid ođadanbargguide.

Doarjaga ulbmilin lea arvvosmahttit sierraviesuid eaiggádiid sirdašuvvat birasustitlaš ja energiijabeaktil liggenvugiide. Oljoliggenvuogis luohpan geahpeda nu dállodoaluid luoitimiid go guhkes áiggi liggengoluid.

Veahki ohcamuša dahkamii oaččut Davvi-Suoma energiijarávvenbálvalusas.

Jos áiggošit luohpat oljoliggenvuogis gánneha dán barggu válmmaštallagoahtit farggamusat. Gánneha veardádallat liggenmolssaeavttuid ja liggenvuogi maid válljet, bivdde das fálaldagaid máŋgga fitnodagas. Plánemii oažžut veahki ámmátolbmuin. Ovdalgo molsu liggenvuogi, lea buorre guorahallat ruovttu energiijabeaktilvuođa ja buoridit dan dađe mielde go lea dárbu.

Doarjaga sáhttá ohcat elektrovnnalaš áššiid dikšun bálvalusas. Nuvttá veahki ohcamuša dahkamii ja eará ruovttu energiijaáššiid gažaldagaide oaččut Davvi-Suoma energiijarávven bálvalusas. Lassedieđuid oaččut čujuhusas https://pohjoissuomenenergianeuvonta.fi/, e-boasttain čujuhusas energianeuvonta@feasib.com ja telefovnnain vuossárggaid dmu 9 – 15 nummiris 44 971 3 681. Lassedieđuid doarjaga eavttuin ja ohcanproseassas gávdná ELY-guovddáža neahttasiidduin.

Artihkal lea almmustahtton Ráhkadusnuppástus koordinašuvdna Ohcejogas -prošeavtta buvttusin.