Gáregasnjárgalaš lomakylä Napakettus ođđa eaiggádat

Badjedeanugeainnus luoitá geaidnu vulos Napakettu Holiday Village resepšuvdnavistti ovdii. Ođđa fitnodateaiggádat Asle Eskola ja Erik Kettunen leaba ovddal mojinjálmmiid ja guokte huskybeatnaga havssašit gussiid buksaleakkaid. Asle ja Erik leaba orron Gáregasnjárggas jahkebeali.

Davvi-Suomas boahtán párra liikostii Lappii vihtta jagi dassái, go leigga orron vahku Bátneduoddara guovllus.

– Lei nu erenomáš vásáhus orrut duottarbarttas čázi ja elrávnnji haga ja nu moai mearrideimme fárret fásta davás, muitaleaba eaiggátguovttos mo oahpásmuvaiga davvi guovlluin. – Sullii golbma jagi dassái fárriime vuos Avvilii ja mannan čavčča bođiime vel davibui, go álggiime Napakettu fitnodateaiggádin Gáregasnjárggas.

– Munnos goappašagain lea measta 20 jagi hárjánupmi áššehasbálvaleamis ja fitnodatdoalus, muitala Asle. – Ieš lean bargan borramušgálvo-, dáhpáhus-, restoráŋŋa- ja hoteallasuorggis ja Erik lea bargan dáhpáhusbuvttademiin ja vuovdebargin. Avvilis gergen bargat earáide, muhto olles áigge lei dakkár dovdu ahte galggašin bargat alccen.  

Napakettu barttat leat fiinna báikkis Anárjoga steallis.

– Láigoheimme sullii 40 jagi doaibman Napakettu ovddeš fitnodatdoalliguoktás, Ritva ja Taisto Haatajas ja divodeimme viđa bartta ja resepšuvnna nu, ahte sáhtiime rahpat fitnodaga ja almmustahttit ođđa bránda-gova juovlamánu beallemuttus, muitaleaba Asle ja Erik. – Resepšuvnnas lea maiddái smávva báikkálaš buktagiid mátkemuitu–skeaŋkagávpi.

Napakettus guossit besset idjadit liekkus hirsavisttiin davvi luonddu askkis. Barttain oaidná njuolga Anárjoga ja Suoma ja Norgga beale duovdagiid.

– Láigobarttat leat vihtta. Buot barttain lea gievkkan-orrunlatnja, oađđinnurki, leapma, sávdni, basadanlatnja ja terássa, ja maiddái sadji gos seailluhit ja ordnet olgo- ja čuoigangálvvuid. Min barttat heivejit buohkaide ja daidda čáhket 1-4 olbmo. Oktiibuot oađđinsajit leat moaddelogi.

– Napakettu barttat gávdnojit dál Booking.com-siiddus, airbnb:s ja expedias. Doaisttážii eanáš oassi gussiin johtá iežas biillain, muhto boahtteáiggis fertejetne smiehttat sáhtu ordnema Avvila ja Leavnnja girdingittiin. Iešalddes Leavnnja girdingieddi lea lagamus, nu ahte Norgga girdinoktavuođat leat dehálaččat.

– Idjadeami lassin fálle aktivitehtaid, mat molsašuddet jagiáiggi mielde. Moai ovttasbarge Gáregasnjárgalaš Nikun Eräpalvelut -fitnodagain ja Niku Rasmus lágidage buot min aktivitehtaid. Napakettu Holiday Village fállá diŋgojumis iđitbihtá uvssa ovdii, gaskabeaibiepmu aktivitehtaiguin ja eahketmállásiid goađis ovttas báikkálaš doaibmiiguin. Maiddái restoráŋŋa Guossis ávžžuhetne boradit, go doppe leat munno mielas duođaid buorre borramušat.

Asles ja Erikis leat ollu jurdagat dan birra maid soai sáhtášeigga fállat áššehasaide ja mo ovddidit fitnodaga doaimma.

– Boahtte dálvvi sesoŋgii áigo vuovdit mátkepáhkaid mátkedoaimmahagaide miehtá máilmmi. Maiddái guolástanturismma ealáskeapmi olles Ohcejoga gielddas geasuha ja plánejetnege guolástusa mátkepáhkaid. Norga ja Jiekŋamearra leat lahka ja dat maid fállá vejolašvuođaid ovddidit doaimmaid. Moai háliidetne ovttasbargat buot iešguđet báikkálaš doaibmiiguin ja gudnejahttit ja árvvusatnit sámiid ja sámekultuvrra, ja doivo ahte munno eai oainne áittan dáppe. Moai letne movttegis olbmot ja háliidetne bargat buori ovttas.

– Letne smávva doaibmit muhto doaivvu mielde gávdne iežame birra fierpmádaga, man bokte sáhttit buohkat olahit eanet, dadjaba fitnodateaiggátguovttos.

– Munno dehálamos árvvut leat luonddu ja báikkálaš kultuvrra gudnejahttin, suvdilis eallinvuohki ja áššehasaid loaktin. Moai háliidetne fállat gussiide seamma erenomáš ja ráfáidahtti vásáhusa, masa ieža liikosteimme Lappis – vejolašvuođa luvvet iežas árgabeaivvis ja dovdat davvi luonddu jaskatvuođa ja čábbodaga, buhtes áimmu ja ráinnas čáziid.

Lassedieđut: napakettu.com