Gielddahoavdda Päivi Kontio: Veteránabeaivvi sáhka
30.4.2025
Árvvu guossit
Sámi soahti nogai 80 jagi dassái 27.4.1945. Maŋimuš duiskalaččat, geat Davvi-Suomas ledje buohkanassii sullii 215 000 albmá, báhtaredje Gilbbesjávrris Norgga beallái 27.4.1945 dmu 13.30. Diet beaivi lea báhcán Suoma soahteveagaid maŋimuš soahtebeaivin ja buorre nu.
Dánge jagi ávvudat Suomas veteránabeaivvi ráfidilis, vaikko máilmmi moivvit leatge álo ain lagabus. Dát bidjá jurddašit leago duođaid olmmošnálli dakkár, ahte válddi hállu doalvu min mielde ja seammás vajálduvvá, maid buot gillámuša, morraša, váivvi ja vaši boastut geavahuvvon váldi máilmmis dagaha. Min nuortaránnjáriikka Ruošša álggahan soahtedoaimmat Ukrainas leat sihkkarit buktán millii min iežamet sođiid jorggáldagaid, dat Suopma, mas dál eallit, livččii sáhttán leat juoga eará.
Mis dáppe davvin nu Norgga beale ránnjágielddain go Ohcejogasge leat muhtin olbmot, geat leat báhtaran Ukraina soađi. Lean gullan máidnasiid ee. Mariupola dáistalusaid birra ja dan birra mo sii čiehkádaddet sevdnjes kealláris elrávnnji ja lieggasa haga smávva mánáiguin, go ballet ahte olles dat ráhkkanus mii lea gohčoduvvon suodjin, gahččá. Mun sáhtán jurddašit dušše dan, ahte ii mihkkige leat rievdan dain olbmuid dovdduin, baluin, diehtemeahttunvuođain, maid sođiid siste vásihit, vaikko gaskkas livččii vássán 80 jagi.
Mii fertet dohkkehit dan duohtavuođa ahte veteránat eai leat šat ollu. Máidnasat ja muittut dollet mielde gudnejahttima ja ipmárdusa dain oaffaruššamiin, maid min soahteáiggi buolvvat barge boahttevaš buolvvaid buorrin iehčanas Suoma bealis. Go min joavkkus eai leat šat sii, geat ieža sáhtášedje máinnastit, iežaset vásáhusaid bokte, de lea min bargu muitit. Nu mo veteránaid iltahuuto -lávlagis daddjojuvvo:
Fuolahehpet, farga jávket vieljat
Muitibehtet sidjiide ráhkis lei eana
Muitalehpet mánáidmánáide lávlagiiguin
Seađđut eai muittut goasge oaččo
Riikkaviidosaš veteránaávvudeami temán lea válljejuvvon ráfisáhka, doallat dán temá maid dáppe Ohcejogas, ii dušše odne, muhto juohke jagi beaivve.
Buori veteránabeaivvi buohkaide.