Gulahus: Guovllu- ja gielddaválggat jagis 2025
19.2.2025
Guovllu- ja gielddaválggat doaimmahuvvojit sotnabeaivve 13.4.2025.
Ohcejogas gielddaválggain válljejuvvojit 15 áirasa. Gielddaválggaide guoski válgaáššeolbmuid doaimmahan evttohasohcamušat váldojit vuostá Ohcejoga gielddadálus 4.3.2025 dmu 12.00-16.00. Ohcamušaid váldiba vuostá guovddášválgalávdegotti ságadoalli ja čálli.
Digi- ja álbmotdiehtodoaimmahat ráhkada almmuhankoartta juohkehaččas, gii lea váldon jietnavuoigatvuođaregistarii, ja sádde dan maŋimustá 20.3.2025 buot daidda jietnavuoigadahtton olbmuide, geaid čujuhus lea dieđus. Jietnavuoigatvuođaregistara dieđut leat oaidninláhkai ja nuvttá oažžumis Digi- ja álbmotdiehtodoaimmahaga meroštallan báikkiin 3.3.2025 rájes. Olmmoš, guhte oaidná ahte son lea vuoiggaheamet guđđon eret jietnavuoigatvuođaregistaris dahje sutnje guoskevaš merken omd. jienastanguovlu lea boastut, sáhttá dahkat njulgengáibádusa Digi- ja álbmotdiehtodoaimmahahkii maŋimuštá 28.3.2025. Jietnavuoigatvuođaregisttar oažžu lága fámu 1.4.2025 dmu 12 rájes.
Jietnavuoigadahtton olmmoš sáhttá jienastit ovddalgihtii man beare almmolaš ovdajienastanbáikkis ruovttueatnamis dahje olgoriikkain. Ovdajienasteapmi ruovttueatnamis lágiduvvo áigodagas 2.4.-8.4.2025 ja olgoriikkain 2.-5.4.2025. Válgabeaivve jietnavuoigadahtton olmmoš oažžu jienastit dušše dan jienastanbáikkis, mii lea merkejuvvon jietnavuoigatvuođaregistarii ja jienasteaddjái boahtán almmuhankortii.
Jienasteaddji lea geatnegas ovdanbuktit válgadoaibmaolbmui čilgehusa identitehtastis. Dan gávnnaheami dihte jienasteaddji galgá ovdanbuktit fámus orru persovdnakoartta, pássa, vuodjenkoartta dahje govalaš Kela-koartta. Dárbbu mielde boleslágádusas oažžu nuvttá gaskaboddosaš persovdnakoartta jienasteami várás.
Guovllu- ja gielddaválggaid ovdajienasteapmi
Ovdajienasteapmi Ohcejoga gielddas lágiduvvo ná:
Girkosiiddas, gielddadálus, váldostivrasáles
- gaskavahko 2.4.2025 dmu 12.00-17.00
- duorastaga 3.4.2025 dmu 12.00-17.00
- maŋŋebárgga 8.4.2025 dmu 10.00-14.00
Gáregasjárgga máŋggadoaimmadálus, máŋggadoaimmalanjas
- bearjadaga 4.4.2025 dmu 15.00-19.00
- lávvardaga 5.4.2025 dmu 10.00-14.00
Njuorggáma máŋggadoaimmadálus, máŋggadoaimmalanjas
- vuossárgga 7.4.2025 dmu 15.00-19.00
Lágádusjienasteapmi
Lágádusjienasteapmi čađahuvvo Ohcejoga rabasbálvalanguovddážis 3.4.2025 dmu 9.00-10.30
Ruoktojienasteapmi
Ovdajienasteapmái, mii dáhpáhuvvá ruovttus, sáhttá iežas almmuhit olmmoš, gean lihkadan- dahje doaibmannávccat leat hedjonan dan muddui, ahte son ii beasa jienastan- dahje ovdajienastanbáikái almmá govttohis váttisvuođaid haga. Oapmahašdikšu, guhte orru seamma dállodoalus ruoktojienasteapmái vuoigadahtton olbmuin, sáhttá jienastit ruoktojienasteami oktavuođas. Ruoktojienasteapmi lágiduvvo soahpamuša mielde áigodagas 2.4.-8.4.2025. Ruoktojienasteamis galgá dahkat almmuhusa čálalaččat dahje telefovnna bokte gieldda guovddášválgalávdegoddái maŋimuštá 1.4.2025 ovdal dmu 16.00 čujuhusain Utsjoen kunta, keskusvaalilautakunta, PL 41, 99981 Utsjoki dahje telefovnna bokte 040 181 0267 / Minna Lukkari dahje 040 181 0264 / Heidi Keskitalo.
Reivejienasteapmi
Válggaid áigge olgoriikkain ássi dahje orru jietnavuoigadahtton olbmot sáhttet jienastit olgoriikkas reivejienasteami bokte.
Jienastanbáikkit
Sotnabeaivve 13.4.2025 leat jienastanguovlluid mielde dát:
Jienastanguovlu: Jienastanbáiki:
002 Vuovdaguoika Gáregasnjárgga máŋggadoaimmadállu
003 Kirkosiida Ohcejoga gielddadállu
004 Njuorggán Njuorggáma máŋggadoaimmadállu
Válgadoaimmahus álgá válgabeaivve 9.00 ja joatkašuvvá boatkkaheamit dmu 20.00 rádjai.
Ohcejogas 13.2.2025
OHCEJOGA GUOVDDÁŠVÁLGALÁVDEGODDI