Lomatärppi investere energiijabeaktilvuhtii
Lomatärppi bartagilli lea čáppa báikkis Deatnogáttis. Lomatärppis leat logi hirsabartta ja juohke bartta birra lea valjis sadji. Barttain leat buorit – ja dat heivejit 2-6 heakka orrumiidda maiddái dálvet.
Lomatärppis leat smiehttan jagiid áigge gollo- ja energiijabeaktilvuođa. Dálkkádatrievdan oidno erenomáš dálkefenomenaid lassáneapmin, ja dan dihtii fitnodat lea smiehttan ruoná sirdašumi. Ulbmilin lea lunddolaččat leamašan maiddái goluid geahpedeapmi. Skábmamánus 2025 Lomatärppi buot barttaide biddjojedje áibmoliggenpumppat.
– Áibmoliggenpumppat ledje buoremus molssaeaktu barttaid liggemii goluid dáfus, go beaivváš ii báitte doarvái beaivvášpanelaide iige eanalieggasa bidjan lihkostuva eananvuođu ráktogeađgeávdnasa dihtii, lohká fitnodatdoalli Juha Reinola. – Geassit áibmoliggenpumppain sáhttá fas čoaskudit barttaid.
– Buot barttat liggejuvvojit elrávnnjiin. Elrávnnji golaheapmi ja golut galggašedje dál njiedjat, go barttain leat áibmoliggenpumppat mat doibmet, buvttadit ja sestet vaikko -35 gráđa buollašis. Ođđasut barttain leat maiddái dollasajit, mat vurkejit lieggasa. Nuba maiddái muorain sáhttá ligget ja dolla buktá liegga atmosfeara luomustalliid bosihanboddui. Boarrásut barttaid rabas dollasajiid eat leat molson, go eandalii eaŋgalaš turisttat liikojit daidda.
Doarjagiid gánnáha ohcat
Fitnodagaid investeremiid dorjot EU-ruhtademiin. Smávit prošeavttaid dorjot Leader-ruhtademiin ja stuorát prošeavttaide sáhttá ohcat ruhtadeami Eallinfápmoguovddážis (ovddeš Ely-guovddáš). Áibmoliggenpumppaide Lomatärppi ozai doarjaga Pohjoisimman Lapin Leader ry:s.
– Min prošeakta ”Lomatärpin energiatehokkuutta parannetaan ilmalämpöpumppujen avulla” oaččui Leader-doarjaga sullii goalmmádasa 23 5000 euro ollislašgoluide. Ohcanmuttus mii árvvoštalaimet man olu áibmoliggenpumppaide investeren seasttašii elrávdnjegeavaheami ja goluid.
– Mis lei ovdal nubbi Leader-prošeakta, mainna ođasmahtiimet min boarráseamos barttaid. Oaččuimet investerendoarjaga 40 % ollislašgoluin njealji bartta basadanlanjaid ođasmahttimii, vai dat vástidit buorebut áššehasaid gáibádusaide.
Leadera investerendoarjaga sáhttet mieđihit ovdamearkka dihtii energiijahámi molsumii ođasmuvvi energiijai, fitnodaga ođasmuvvi energiija geavaheami lasiheapmái ja energiija- ja materiálabeaktilvuođa buorideapmái. Doarjaga ohccis livččii buorre leat áššedovdi ráhkadan energiijadárkkisteapmi, mas čielggaduvvojit sajiide heivvolamos energiijahámit ja investerema mearkkašupmi energiijabeaktilvuhtii.
Juha Reinola leamašan duđavaš doarjagiidda, maid lea ožžon fitnodaga smávit investeremiidda. Muhto plánejuvvon ođđa barttaid ja smávva restoráŋŋaviesu huksen lea báhcán barggakeahttá go Ely-guovddáš ii leat juolludan ruhtadeami.
– Mii livččiimet háliidan juohkit huksenbargguid moatte jahkái nu, ahte eat huksešii buot plánejuvvon barttaid seamma áigge, vai loatnamearit ja iešruhtadandárbu eai hávil stuorošii sakka, muitala Juha Reinola. – Dát ii lihkká heive ruhtadeaddjiide, muhto investeremiid galggašii dahkat buot hávil. Oaidnit leš ollašuvvetgo dát ođđa investeremat goassige.
Lomatärppi barttaid geavahanmearri lea buorre
Lomatärppi barttat láigohuvvojit juovla-njukčamánus guovssahassesoŋŋa áigái Aurora Service Tours:ii, mii buktá olgoriikkalaš turisttaid barttaide. Guossit bohtet eanáš Stuorra-Británnias, Espánnjas, Duiskkas ja Itálias. Aurora Service Tours ordne turisttaide aktivitehtaid, dain dehálamos lea bivnnuhis guovssahastuvrrat. Lomatärppi šiljus lea iežas guovssahastoardna, gos oaidná bures almmi albmanemiid.
– Dát ovttasbargu lea doaibman duođaid bures ja álkidahttá min barggu, muitala Juha Reinola. – Muđuid mii láigohat barttaid ieža ja ordnet aktivitehtaid dan mielde maid áššehasat háliidit. Mii ovttasbargat maiddái eará turismafitnodagaiguin, go eathan mii astta ieža visot bargat.
https://lomatarppi.fi/
https://pohjoisinlappi.fi/yrityksille/
https://elinvoimakeskus.fi/yritysrahoitus