Ohcejoga gielda fidnii 125 000 euro Luossaguovddáža joatkkaplánemii

Ohcejoga gielda fidnii 125 000 euro Luossaguovddáža joatkkaplánemii riikkabeivviid juovlaskeaŋkaruđain.

Gielddahoavda Päivi Kontio lea duhtavaš gildii boahtán juovlaskeaŋkaruđain: – Mii beassat joatkit Luossaguovddáža ovdačielggadanprošeavttas álggahuvvon barggu.

Luossaguovddáš lea plánejuvvon máŋga jagi, dasgo luossanáli heajos dilli ja dan dihte álggahuvvon luossagieldu leat nuppástuhttán sakka ohcejohkalaččaid eallima. Luossabivdogieldu lea joatkašuvvan juo njeallje jagi ja luosa jávkan Deanus leat bággen johgáddesápmelaččaid ođđa dili ovdii. Luosaid geahppáneami dihte váikkuhusat leat čoggon ja dátges lea čuohcan sakka maid gieldda ruhtadollui ja guovllu turismii.

– Ovdačielggadanprošeavtta áigge bođii čielgasit ovdan, ahte báikkálaččain lea miehtemielat doaladupmi Luossaguovddážii ja johkabivdokultuvrra vurkemii, ovdanbuktimii ja ovddideapmái lea dárbu, muitala Päivi Kontio. – Luossaguovddáža háliidit áimmahuššat ja ovddidit sámekultuvrra. Ulbmilin lea duddet guolástangielddu negatiivvalaš váikkuhusaid ja váldit badjelassii koordinerenovddasvástádusa johgáddesápmelaš guollebivdoárbbi vurkemis, áimmahuššamis, ovdanbuktimis ja sirdimis mánáide ja nuoraide. Luossaguovddážis lea maiddái dehálaš rolla guollebivdomáhtu heiveheamis ja ovddideamis.

Dárkkuhus lea, ahte luossaguovddáš doaibmá árbedieđu, lundui ja lussii gullevaš doaibmiid ja dutkan-, ovddidan- ja innovašuvdnadoaimma oktasašbargobáikin. Seammás dan vuođđudeapmi doarju sakka Ohcejoga ođasmuvvi turismma.

Riikkabeivviid juolludan ruhtademiin válmmaštallat čuovvovaš doaimmaid:

• Kártet ja válljet Luossaguovddáža oamastanhámi.
• Plánet ja válmmaštallat ruhtadanmálle Luossaguovddáža investerema ja dan fuolaheami várás.
• Plánet Luossaguovddáža doaibmasajiid ja dárkkálmahttit doaimmaid ja sajiid ja válmmaštallat vejolaš giddodatfitnodaga.

Lassedieđut:

Gielddahoavda Päivi Kontio
040 744 7630
paivi.kontio@utsjoki.fi

Ohcejohkii huksejuvvo luossaguovddáš, mii doarju surggiidrasttildeaddji doaimmaiguin johgáddesápmelaš kultuvrra ealli árbbi. Dálkkádatrievdan nuppástuhttá johgáddesápmelaččaid birrasa. Luonddu geavaheaddji ealli kultuvra ferte sakka rahčat, vai dat vuogáiduvašii rievdamii ja vai dat nagodivččii fievrridit kulturárbbi boahttevaš buolvvaide. Luossaguovddáš čohkke doaibmiid, diehtaga ja servodaga máŋgga suorggis seamma gáhtu vuollái bargat dán barggu ja ovdanbuktit ealli kultuvrra muitalusa guovllu ássiide ja mátkkálaččaide.