Ohcejoga gieldda oassálasti bušeahttaplánen: vuoitin šattai buot giliid giligova čábbudeapmi

Ohcejoga gielddas ordnejuvvui vuosttas háve gieldda olbmuide vejolašvuohta váikkuhit boahtte jagi bušeahta válmmaštallamii. Vuosttas vuorus ohce rabas jearahallamin evttohusaid jienastussii, ja nuppi vuorus jienastuvvui. Jienastussii lei válljenráđđi válljen ollašuhttima ektui gelbbolaččamus ideaid.

-Mu mielas dát lea buorre vuohki váldit gieldda olbmuid mielde ovddidit gieldda doaimmaid ja plánet mo gielda ruđaid geavaha, dadjá gielddahoavda Päivi Kontio. – Erenomážit dán dilis, go gártat gielddas seastit, lea buorre diktit maid gieldda olbmuid váikkuhit boahtte jagi bušeahta ráhkadeapmái.

Čielga vuoitin šattai buot giliid giligovaid čábbudeapmi, masa lea čielga dárbu.
–  Dát lea buorre ášši, go dál ožžot doaibmabijuid bealeheamet buot giliin, illuda Kontio.
– Oaidnit, maid 6 000 euroin oažžut áigái ja sáhttágo dása laktit eará ruhtadeami. Dađi bahábut ii juolluduvvo gielddaide leader -ruhtadeapmi giligovaid čábbudeapmái, muhto gilisearvvit ja eará vejolaš searvedoaibmit berrešedje ieža ohcat leader -ruhtadeami giliid ovddideapmái.

Giligovaid ortnegii bidjan čalmmustahttojuvvo ja ollašuhttojuvvo jagi 2026 bealde. Ollu leat boahtán evttohusat, mo ja mainna lágiin giligova sáhttá buoridit. Dáid visot váldit vuhtii plánemis.

– Buohkanassii jienasteaddjit ledje badjelaš čuođi, nu ahte stuorra giitosat buohkaide, geat jienastedje ja bukte evttohusaid, giitala Päivi Kontio. – Dálá dieđu mielde boahtte jagi ollašuhttit seammasullasaš oassálasti bušeahttaplánema kampánja, vai gieldalaččat besset ovdanbuktit iežaset oaiviliid ja ássiide dehalaš áššiid ollašuhttimii.

Lassedieđut

Gielddahoavda Päivi Kontio
040 744 7630
paivi.kontio@utsjoki.fi