Ohcejoga gieldda olbmot čájehedje nana doarjaga dálkkádatbargui

Ohcejoga gielda ollašuhtii dálkkádatplána válmmaštallama oassin dálkkádatgažadeami, mainna čielggadedje gieldda olbmuid, asttuáigge ássiid, fitnodagaid, gieldda bargiid ja luohttámušolbmuid oainnuid gieldda dálkkádatbarggu ovddideamis. Gažadeapmái vástidedje 36 olbmo ja vástideaddjiin measta bealli ledje Ohcejoga fásta ássit.

Gažadeami bohtosat čájehit ahte gielddaolbmot leat beroštuvvan dálkkádatáššiin: badjel 80 % vástideaddjiin muitalii ahte lea duođaid dahje oalle beroštuvvan dálkkádatáššiin.

Energiijabeaktilvuohta beroštahtii čielgasit eanemusat

Eatnážat guottihedje doaimmaid mainna buoridit energiijabeaktilvuođa gieldda iežas visttiin. Measta juohke vástideaddji mielas energiijagolahusa čuovvun, čuovggaid ođasmahttin ja oljoliggemis luohpan ledje dehálaš áššit. Maiddái  energiijabeaktilvuođa rávvenbálvalusa fállan sihke ássiide ja fitnodagaide dolle dehálažžan.

Rabas vástádusain deattuhuvvojedje ođasmuvvi energiija ávkin atnin, áibmomolsunrusttegiid buoret mudden ja eanalieggasa ja liggenpumppaid háhkama ovddideapmi.

Olbmot sávve čovdosiid lihkadeapmái ja gáiddusbargui

Johtolaga buohta eanáš oassi vástideaddjiin anii dehálažžan dan ahte gielddas livččii oktasašbiila ja gáiddusbargosadji. Vástideaddjit guottihedje maiddái sihkkelastima ovddideami, vaikko oaivilat juohkásedje vehá eanet go energiijagažaldagaid buohta. Evttohusain bohte ovdan almmolašjohtolaga ovddideapmi, gieldda fievrrut, mat nuoskkidit uhcit, ja sihkkelovdu gieldda bargiide.

Báikkálaš borramuš ja bázahusaid šláddjen ožžo olu doarjaga

Gierdogeava ja suvdilis golaheami temáin erenomážit báikkálaš borramuša vuoruheapmi ja badjelmearebiepmu geahpedeapmi guottihuvvui. Maiddái bázahusaid šláddjenvejolašvuođaid buorideapmi lei vástideaddjiid mielas dehálaš. Gielddaolbmot sávve lasi šláddjenbáikkiid ja ođđa čovdosiid, nugo oktasaškomposterema ja boahtalmáhcahanautomáhta. Dan lassin vástideaddjit doivo ahte gielda čájehivččii ovdamearkka šláddjenvieruidisguin.

Gulahallan ja konkrehtalaš dagut adnojit árvvus

Dálkkádatgulahallama hárrái vástideaddjiid mielas lei dehálaš ahte gielda gulahallá čielgasit dálkkádatplánas ja dálkkádatbarggu ovdáneamis. Energiijaseastinkampánjjat guottihuvvojedje, ja rabas vástádusain deattuhedje bissovaš gulahallama gielddaolbmuiguin ja albma ja konkrehtalaš daguid “ruonábassama” garvima ovdii.

Dálkkádatgažadeami bohtosat geavahuvvojit ávkin Ohcejoga gieldda dálkkádatplána joatkkabarggus. Gielda giitá buot vástideaddjiid aktiivvalaš searvamis ja mávssolaš oainnuin.

Vuorbádeami vuoitit

Dálkkádatgažadeapmái vástidan ja oktavuohtadieđuid guođđán olbmuid gaskka vuorbáduvvojedje guokte 40 euro skeaŋkakoartta gieldda skeaŋkakoartafitnodagaide. Vuorbádeami vuittiiga Pilvi Guttorm, Katariina Roiha ja Mika Aikio. Olu lihku vuoiti guoktái! Vuoiti guovttos leaba ožžon dieđu šleađgapoasttain.