Ohcejoga gielddastivra máhcahii skuvlalaččaid gaskabiepmuid ruovttoluotta bušeahttaárvalussii

Ohcejoga gielddastivra doalai jagi maŋimuš čoahkkima 17.12. Áššelisttus lei ruhtadoalloáššiid lassin dušše okta hálddahusnjuolggadusa nuppástus, man geatnegahttá bargofápmobálvalusaid sirdáseapmi gielddaid ovddasvástádusa vuollái jagi 2025 álggus.

Áššelisttus ledje máŋggat áššit, mat laktásit ruhtadollui. Dain dehálamos lei boahtte jagi bušeahttaárvalus sihke golmma čuovvovaš jagi ekonomiijaplána. Bušeahttaárvalus čájeha vuollebáhcaga, vaikko seastimiid leat figgan gávdnat juohke doaibmasuorggis. Gielddahoavda Päivi Kontio sihke doaibmasuorgehoavddat deattuhedje, ahte buot vejolaš seastinvuogit leat geahččaluvvon gávdnat.

Čavga ekonomalaš dilli ságastahtii váldostivrra áirasiid, dasgo fuolla gieldda boahttevuođas lea oktasaš. Manuid geahpedeami lassin áirasat ávžžuhedje ohcat maid dienasgálduid. Eanemus ságastallama bohciidahtii skuvlalaččaid gaskabiepmuid sihkasteapmi eret bušeahtas. Bušeahttaárvalus dohkkehuvvui ovtta jienasteami maŋŋá, go Ilmari Tapiola evttohusas gaskabiepmut máhcahuvvojedje bušehttii jienaiguin 9-3 (1 guoros).

Muhtun lassemearreruhtaevttohusat dohkkehuvvojedje dakkáražžan almmá nuppástusaid.

Gielddahoavda Päivi Kontio giitalii áirasiid vássán jagis ja sávai, ahte buorredáhtolaš mearridankultuvra joatkašuvašii maid boahtte jagi – gielddaválggain fuolakeahttá.

Čoahkkima beavdegirji (pdf)

Lassediehtu:

Gielddastivrra ságadoalli
Arto Pohjanrinne
040 770 3986
arto.pohjanrinne@utsjoki.fi

Gielddahoavda
Päivi Kontio
040 744 7630
paivi.kontio@utsjoki.fi