Ohcejoga giliide gárvvistišgohtet gilidorvvolašvuođaplánaid

Ohcejoga gielddas gárvvistišgohtet gilidorvvolašvuođaplánaid ovttas gilidoaibmiiguin. Plánaid gárvvistanbarggu jođiha gieldda buresveadjinhoavda Pirjo Seurujärvi. Plánaid dahkan álggahuvvo gilidorvvolašvuođaeahkediin Ohcejogas, Njuorggámis ja Gáregasnjárggas skábmamánu loahpageahčen.

Mas lea gažaldat?

– Gili dorvvolašvuođaplána lea guovllu ássiid ovttas čohkken plána, mainna buoriduvvo árgga dorvvolašvuohta ja njuovžilvuohta ja ráhkkanaddo iešguđetlágan heahtediliide, muitala Pirjo Seurujärvi. – Árgabeaivve dorvu ja gilidorvvolašvuohta šaddá beaivválaš ovttastallamis, doaibmabirrasis ja ráhkkaneamis. Dát oppalašvuohta hábme vuođu maid dorvvolašvuođaplánii.

– Gilidorvvolašvuohta ovddiduvvo máŋgga sierra doaibmi ovttasbargguin. Mielde dárbbašuvvojit guovllu fásta ássit, asttuáigge ássit, searvvit ja eiseválddit. Gilidorvvolašvuođa buorideapmi lasiha maid servvolašvuođa gilis. Dorvvolašvuođaplána gárvvisteapmi ja ollašuhttin lea jotkkolaš bargu, dasgo plána lea buorre bidjat jeavddalaččat áiggi dássái.

Giliid dorvvolašvuođaplánaid gárvvisteamis ávkkástallo vuođuin, man leat dahkan Pohjois-Karjalan Kylät ry ja Maaseudun sivistysliitto ja man Suoma Gádjunsuorggi Guovddášorganisašuvdna SPEK lea bidjan áiggi dássái.

– Mii sávvat buot giliolbmuid buresboahtin gárvvistit oktasaš dorvvolašvuođaplána, mainna sáhttit ráhkkanit vejolaš áitta- ja kriisadiliide giliin, dadjá Pirjo Seurujärvi.

Ohcejoga gilidorvvolašvuođaeahkedat:

• Ohcejohka – maŋŋebárgga 18.11. dmu 18 Giliviessu Giisá
• Njuorggán – duorastaga 20.11. dmu 18 skuvla-máŋggadoaimmadállu
• Gáregasnjárga – vuossárgga 24.11. dmu 18 Giliviessu Sáivu

Lassediehtu:

Buresveadjinhoavda Pirjo Seurujärvi
040 139 5420
pirjo.seurujarvi@utsjoki.fi