Ohcejoga heargecup ordnejuvvo nuppe háve 28.2.-1.3.2026 - Muhto mobat heargecupa sáhttá čuovvut?

Ohcejogas leat beassan bures johtui heargegilvvohallamiid ordnemis, go badjelaš 20 jagi bottu maŋŋá ordnejedje viimmát mannan jagi heargegilvvohallamiid Ohcejogas. Muhto mobat heargecupa sáhttá čuovvut?

Dán jagi Suomas bohccuid gilvvohallanbadjái gullet Heargecup ja dan vihtta oassegilvvu, mas bálkkašuvvojit golbma eanemusat čuoggáid čoaggán hearggi  ja vuoddji. Heargegonagasgilvvuide besset 24 Heargecupas eanemusat čuoggáid čoaggán hearggi. Heargegonagasgilvvut vuddjojit árbevirolaččat Anáris Heargecup loahpas.

Juohke Heargecupii oassálasti gilvoheargi galgá čađahit rátkkagilvvuid nappo vuodjit vuollel minuvtta ja 25 sekundda áiggi kilomehter guhkkosaš bánas.

Ohcejoga Heargecupai gullet vuosttas beaivvi almmolaš báhkkaluohká álgoearit ja nuppi beaivvi semifinálat, finálat ja juniorluohkká.

Almmolaš luohkká

Gilvohearggi mátki álgá almmolaš luohkás, masa besset hearggit mat leamašan johtilabbot go rátkkaáigi. Almmolaš luohkás boazu beassá báhkka luohkkái go vuodjá heargecupgilvvus vuollel 1 minuvtta ja 19,499 sekundda. Dan lassin heargecup gilvvus almmolaš luohká A-finála golbma buoremusa sirdásit automáhtalaččat báhkka luohkkái. Nappo Ohcejoga heargecupa almmolaš luohká golbma buoremus hearggi gilvalit čuovvovaš Salla heargecupas báhkka luohkás, lassin dohko besset hearggit mat leat olahan báhkka luohká áigeráji.

Sáhttá lohkat ahte johtilis vuojánat gorgŋot ovtta heargecupbaji áigge almmolaš luohkás báhkka luohkkái.

Vuosttas gilvvohallanbeaivve buot almmolaš luohká hearggit servet álgoeriide. Álgoeriin mannet ovddos guvlui 36 hearggi. Juohke vuolgagis mannet ovddosguvlui automáhtalaččat vuolgaga vuoiti, loahpat joatkkabáikkit juhkkojuvvojit áiggiid mielde.

Semifinálat ja finálat vuddjojit nuppi gilvvohallanbeaivve. Semifinálain vuddjojit guhtta vuolgaga guđain herggiin, main vuoiti beassá A-finálii ja nubbin boahtán beassá B-finálii. Loahpat gahččet eret finálain.

Finálas vuddjojit guokte vuolgaga. A-finálas juhkkojit almmolaš luohká sajit 1.-6. ja B-finálas sajit 7.-12. Almmolaš luohká finalisttaide juhkkojit Ohcejogas 700-45 euro sturrosaš ruhtabálkkašumit saji mielde.

Čuovo dáid ođđa vuojániid:

Gáldooaivvi bálgosis Jiella, Báišduoddara bálgosis Deetnu ja Avvila bálgosis Huuto.

Báhkka luohkká

Báhkka luohkás gilvalit buot falimus hearggit. Báhkka luohká struktuvra lea seamma go almmolaš luohkás, nappo álgoeriin besset ovddosguvlui 36 hearggi. Čuovvovaš beaivvi semifinálain guđa hearggi  vuolgagiin vuoitit besset A-finálii, nubbin boahtán B-finálii ja goalmmádin boahtán C-finálii.

Finálas vuddjojit golbma vuolgaga, A-finálas juhkkojuvvojit almmolaš luohká sajit 1.-6., B-finálas sajit 7.-12. ja C-finálas sajit 13.-18. Báhkka luohká finalisttaide juhkkojit Ohcejogas 1200-75 euro sturrosaš ruhtabálkkašumit saji mielde.

Čuovo dáid:

Báišduoddara Kultala, mannan jagi Ohcejoga gilvvu vuoiti Kaunispää, Avvila bálgosa Lämppäri ja mannan jagi Gonagasgilvvuid vuoiti Nikama.

Juniorluohkká

Juniorluohkás boahtteáiggi vuoddjit besset iskkadit searaid dábálaččat finálain jo gahččan vuojániiguin. Juniorluohká oassálastit leat dábálaččat 8-14-jahkásaččat. Nuoramus juniorat álggahit gilvaleami dábálaččat sierravuodjimiin ja jo hárjánan juniorat párravuolgagiin. Nuorat servet ollesolbmuid luohkáide dábálaččat 15-jahkásažžan.

Dihtetgo?

Vuosttas gilvvohallanbeaivve buot herggiiguin gilvalit bána oktii čađa, nuppi beaivve oktii dahje guktii, lea das gitta ovdánago heargi finálii. Buoremus ja bivnnuheamos vuoddjit fas sáhttet vuodjit beaivvi áigge bána iešguđet herggiiguin nuge máŋgii go 20 geardde.

Gilvohearggi jovkui gullet: oamasteaddji(t) ja hárjeheaddji(t), vuoddji, sabehiid vuoidi ja doarjjajoavkkut, nappo dábálaččat olles boazobearaš. Heargegilvvohallamat leat duođalaš, muhto lotkes gilvvohallamat ja movttegamos lahtuid sáhttá oaidnit gilvvohallanbáikkis jo iđitguovssu.

Gilvobána ja dan huksema lihkostuvvan lea gilvvohallama dehálamos oassi. Lea gažaldat gilvvohallamiid lihkostuvvama lassin maiddái dorvvolašvuođas, go eandalii menddo čavges mohkki lea herggiide ja vuoddjiide váralaš. Bivvalis dálki, arvi ja muohtavátnivuohta váttásmahttet bána huksema. Dán jagi buollašat leat álkidahttán bánabargguid.

Buresboahtin Ohcejohkii heargecup-gilvvohallamiidda guovva-njukčamánu doajáldagas 2026!

Lávvardaga 28.2. Ohcejoga asttuáiggeguovddážis leat pop-up-restoráŋŋat ja čuojaheamen beakkánis Yungmiqu ja Intrigue.

Kaisa Tapiola-Länsman
Govva Ohcejoga heargecup 2025: Pekka Sammallahti