Ohcejoga sámelogahaga ja Turku universitehta ovttasbargu  šaddá duohtan stuđeremiin ovttas

Turku universitehta, Sámediggi ja Ohcejoga gielda vuolláičálle mannan geasi ovttasbargošiehtadusa, masa lea čállojuvvon oktasaš dáhttu guhkesáigásaš ovttasbargui ja verddevuođa ovddideapmái.

Oktasaš ulbmilin lea guorahallat guovddáš temáid, mat laktásit árktalaš guovllu rievdamii ja máŋggabealatvuhtii. Konkrehta ovdamearka ovttasbarggus lea Turku universitehta ja Ohcejoga logahaga oahppolágádusovttasbargu, mii dál konkretiserejuvvo Ohcejoga logahaga allaskuvlavahku áigge. Ohcejoga logahaga ja Turku universitehta bargit leat válmmaštallan álgočavčča áigge oktasaš stuđerenvahku.

Universitehta stuđeanttat ja Ohcejoga logahatstuđeanttat oahpásmuvvet ovttas árktalaš lundui, dutkamii sihke sámekultuvrii 29.9. – 4.10.2025. Allaskuvlavahku temán lea nuppástus dahjege máŋggadieđalaš geahččanguovlu árktalaš lundui ja kultuvrii.

– Vahku áigge gullat Turku universitehta ja Luondduriggodatguovddáža oainnuid árktalaš luonddu rievdamii , ja Ohcejoga logahaga oahpaheaddjit láidestit stuđeanttaid sámekultuvrii ja sámegillii, muitala Ohcejoga gieldda buresveadjinhoavda Pirjo Seurujärvi. Eahketbeivviid leat gieddebarggut earet eará Geavu dutkanstašuvnnas ja Skállováris. Vahkku nohká guovttebeaivásaš mátkái Norgii Várjavutnii.

– Min ulbmilin lea oažžut logahagas árktalaš guovllu spesiálalogahat, mas lahkonit máŋggadieđalaččat iešguđetlágan nuppástusdahkkiid váikkuhusaid min birrasii, dadjá Seurujärvi.  – Danin go mii leat Suoma gielda gos olbmuin eatnasat leat sápmelaččat, de leat maid sámekultuvra ja sámegiella hui guovddáš fáttát maiddái dán ollisvuođas.

– Midjiide lea hui dehalaš ahte mii sáhttit fállat logahat stuđeanttaideamet ođđa vejolašvuođaid čiekŋudit sin iežaset oahpuid. Mun jáhkán, ahte dán lágan máŋggasuorggi rasttildeaddji ovttasbargu addá midjiide jáhku boahtteáigái, deattuha Ohcejoga gieldda gielddahoavda Päivi Kontio.

Allaskuvlavahkkui oassálastet guhtta stuđeantta Turku universitehtas ja 15 logahatstuđeantta Ohcejogas.

Stuđeanttat leat duđavaččat dasa maid vahkku addá. Ohcejoga logahaga oahppiid Eemeli Tirkkosa ja Enni Kunttu mielas vahku fáttát leat leamaš miellagiddevaččat. – Leamašan earálágan ja suohtas stuđeret eará báikkiin go skuvllas ja oahpásmuvvat eará áššiide turkulaččaiguin ovttas. Ovdamearkka dihte Luondduresursaguovddáža logaldallan luosa birra lei duođai miellagiddevaš, dadjet logahat stuđeanttat. Beroštupmi universitehtaoahpuide lea nanosmuvvan dán vahkus.

Turku universitehtas etnologiija magisteroahpuid stuđeantta  Julia Jäsberg lea maid ilus das maid gursa addá: – Dáppe davvin báikki alde áššit maid stuđere šaddet konkrehtalažžan, dasgo vaikko materiála lea midjiide oahpis, de báikkálaččaid máidnasat leat dehálaččat ja dat lasihit áddejumi davviguovllu dilis. Máŋggasuorggi rasttildeaddji gursa lea dehálaš danin go iešguđet dieđasuorggit laktásit oktii. Loahppavahku mátkki Várjavutnii vuordit buohkat stuorra movttain.

Lassedieđut

Buresveadjinhoavda Pirjo Seurujärvi
040 139 5420
pirjo.seurujarvi@utsjoki.fi