Ohcejoga virgedálu 40 jagi

Govva: Lapin Kansa arkiiva

Dihtetgo ahte Ohcejoga gielddadállu gárvánii ovdal Sámi šalddi jagi 1986? Dállu deavdá dán jagi 40 jagi. Gielddadálu jorba jagiid gudnin gielddadállu leat rabas buohkaide 16.2.2026.

Ovdal ođđa dálu Ohcejoga gielddadállun doaimmai ássanviessun huksejuvvon muorravisti, mii lei gárži gielddadálu doaimmaid ektui. Dál ovddeš gielddadálus doaibmá Gilidállu giisá.

Ohcejogas ledje 1970-80 loguid doajáldagas ohcan máŋggaid jagiid čovdosa sadjevátnivuhtii, muhto gieldda heajos ruhtadilli ja huksenorganisašuvnna váilun eastadedje lasse- dahje ođđahuksema. Gielddadálloprošeavtta njunušalbmát leigga gielddahoavda Toivo Suomenrinne ja gielddaráđđehusa ságadoalli Hans Niittyvuopio.

Gielda bivddii máŋgii veahki stáhta eiseválddiin ja erenomážit stáhtaruhtaministeriijas ja huksenhálddahusas vai beasašedje hukset dárbbašlaš doaimmahatsajiid. Gielda doaivvui ahte stáhta eiseválddit searvvašedje huksenprošektii váldohukseheaddjin (Rakennushallitus, Utsjoki, tilantarveohjelma 10.2.1983)

Huksenhálddahusas dahke virgebargun sadjedárbbuprográmma, mas kártejedje vejolaš sajiid dárbbašeaddjiid.  Gielddahoavda Toivo Suomenrinne namas vulge máŋggat gulaskuddamat stáhta iešguđet organisašuvnnaide sadjedárbbuin, ovdamearkka dihtii Alkos jerre dárbbašago gávpi saji Ohcejoga gilis. Dárbbu ođđa sajiide almmuhedje Lappi duopmogotti Ohcejoga gearretgoddi, Ohcejoga poastadoaimmahat ja Anára bargofápmodoaimmahaga siidobálvalanbáiki.

Sadjedárbbuprográmmas evttohuvvui, ahte stáhta luobahivččii Ohcejoga gielddadálloprošektii dárbbašlaš tontte, fuolahivččii giddodatoasusgotti hámis prošeavtta hukseheamis ja várrešii viesus doaibmasajiid stáhta doaimmahagaid várás, mat doibmet Ohcejogas.

Stáhtaruhtaministeriija nannii mearrádusain borgemánus 1983 Ohcejoga virgedoaimmahatsajiid sadjedárbbuprográmma ja mearridii huksenhálddahusa bargun plánet ja huksehit Ohcejoga gildii virgedoaimmahatdálu giddodatfitnodaga nammii, mii vuođđuduvvo.

Kiinteistö Oy Utsjoen Virastotalo -nammasaš oasusfitnodatsearvvi vuođđudeaddjiosolaččat ledje Suoma stáhta (huksenhálddahus), Ohcejoga gielda ja Pohjolan Osuuspankki. Vuođđudančoahkkin dollojuvvui ođđajagimánus 1984 ja fitnodat merkejuvvui gávperegistarii seamma jagi njukčamánus. Vuosttas fitnodatjođiheaddjin válljejuvvui poastadoaimmahaga dikšu Pekka Haapala.

Giddodatfitnodatoasussearvi dagai huksenhálddahusain soahpamuša, man mielde huksenhálddahus doaibmá gielddadálu hukseheaddjin.

Tontte oste Suoma stáhtas. Huksenhálddahus vuvddii giddodatfitnodahkii 88 000 márkki gávpehaddái huksenbáikin sullii 11 000 njealjehasa mearreviidodaga Ohcejoga čoahkkebáikkis. Miessemánus 1984 huksenprošeavtta golloárvvoštallan lei measta 7 miljovnna márkki, mas gieldda oassi lei 4.1 miljovnna.

Ođđa dállui sárgo sajiid gieldda dárbbuide, stáhta virgedoaimmahagaide ja fitnodagaide. Giddodaga lanjadagaid ollesviidodat lei measta 1100 m².

Skábmamánus 1984 vuolláičálle huksenhálddahusa gilvalahttán agoartasoahpamuša: Rakennusliike OPM-Yhtymä Oy dagai sullii 5,3 miljovnna agoartahaddái huksen-, bohcce-, áibmomolsun- ja elektrifiserenbargguid. Váldoagoartabargin lei OMP-Yhtymä Oy. Vuolit agoartabargi Pohjolan Onninen Oy vástidii bohccebargguin, Putkipoke Oy áibmomolsunbargguin ja Utsjoen Sähköosuuskunta elektrifiserenbargguin.

Hárjjiceggenávvudeapmi lei borgemánus 1985. Dállu váldojuvvui atnui ođđajagimánus 1986.

Gáldut: Kiinteistöyhtiö Utsjoen virastotalo Oy arkiiva.

Ohcejoga virgedálu 40 jagi (pdf)