Ohcejogas millii čuohcci dálvefestiválavahkkoloahppa 28.2.-2.3.2025

Ohcejogas ordnejuvvojit boahttevaš vahkkoloahpa áigge Ranniot Reindeer Race oassegilvvut. Gilvovahkkoloahpa áigge leat dievva prográmmat olles bearrašii. Heargegilvvut ja mánáid dálvemáilbmi Máttajávrri alde leat buohkaide rabas ja nuvttá dáhpáhusat. Eahkediid Ohcejoga Hoteallas (Hotelli Utsjoki) rávesolbmuide čuojaha sámeeatnama beakkáneamos dj-kollektiiva Article 3 ja norgalaš Felgen Orkester.

Ohcejoga girkosiiddas ordnejuvvojit boahttevaš vahkkoloahpa áigge heargegilvvut vuosttas háve 1990-logu maŋŋá. Ohcejogas leat bohccot logi geardde eanetgo olbmot ja boazu váikkuhage muhtun láhkai juohke gieldalačča eallimii. Danin Ohcejogas illudit heargegilvvuid máhccamis ja logit gieldalaččat leat ordnemiin mielde.

”Heargegilvvuin lea leamaš jahkelogiid áigge stuorra mearkkašupmi olbmuid oktii čohkkejeaddji fápmun. Giđđadálvve lea suohtas čoahkkanit guhkes skábma maŋŋá gullat ja muitalit ságaid ja eandalii geahččat, mii heargegilvomáilbmái gullo. Gilvobáikkis gealdagasa ja livkasa sáhttá duođai dovdat. Vaikko guhkimus mátkki duohken boahtti gilvvohallit bohtetge čuđiid kilomehteriid duohken, jáhkán ahte Ohcejoga duovdagat ja gilvoatmosfeara leat guhkes mátkki veara.” Dadjá Ohcejoga heargegilvvuid suodjaleaddji Sámi bálgosiid ságadoalli Tiina Sanila-Aikio.

Ohcejoga heargegilvvuide leat almmuhuvvon badjel 120 hearggi ja galledeaddjiid vuordit miehtá davvi Suoma. Gilvvuid álgoearit vuddjojit lávvordaga 1.3. ja semifinálat ja finálat sotnabeaivve 2.3. Maiddái juniorvuoddjiid čehppodaga beassat čuovvut sotnabeaivve.

Prográmma olles bearrašii

Oassegilvovuodjimiid lassin dáhpáhusbáikkis lea mánáide oaivvilduvvon mánáid dálvemáilbmi ja restoráŋŋa. Gilvvu rahpet fiinna juoigit Ánnamáret ja Ántte Issát Länsman. Lassin heargegilvvuid oktavuođas ordnejuvvo čearpmahiid čuorvvasgávpi, mas vuvdojit Gáldooaivvi bálgosa beakkánis varrisbohccot.

Gilvvuid ovdafeasttat ordnejuvvojit Ohcejoga hoteallas bearjadaga dii 21 rájes. Ovdafeasttas čuojaha sámeeatnama beakkáneamos dj-kollektiiva Article 3 dahje Alice Marie Jektevik ja Petra Laiti. Boazogilvvuid joatkkafeasttas lávvordaga 1.3. fas oaidnit Sámeeatnama Bruce Springsteenin gohčoduvvon norgalaš Felgen Orkestera. Bileahtaid eahketdáhpáhusaide sáhttá oastit virgeáigge Ohcejoga gielddadálus dahje ovdal dáhpáhusa restoráŋŋa uvssa guoras.

Nuvttá sáhttu gilvobáikái

Máttajávrri dáhpáhusbáikái lea ordnejuvvon nuvttá sáhttu Ohcejoga girkosiiddas. Ohcejoga heargecup gilvobáikki biilaparkerensadji lea rájálaš ja dáhpáhusa lágideaddjit sávvet ahte olbmot bohtet báikki ala nuvttá sáhtuin dahje oktasaš sáhtuiguin. Ohcejoga gilis biillaid sáhttá guođđit gielddadálu, Ohcejohnjálmmi skuvlla ja beaiveruovttu ja maid astoáiggeguovddáža šilljui. Sáhttu vuolgá gielddadálus, man maŋŋá dat vuodjá váldogeainnu mielde ja váldá gilvobáikái háliideaddji gehččiid fárrui bussebissehagain, mat leat váldogeaidnoguoras. Dáhpáhusa sáhtu áigeplánat gávdnojit dáhpáhusa neahttasiidduin utsjoki.fi/porocup

Olles prográmma ja lassedieđut dáhpáhusa birra www.utsjoki.fi/porocup

Lassidieđut

Kaisa Tapiola-Länsman
astoáiggečálli
0400 319 852
kaisa.tapiola-lansman@utsjoki.fi

Emmi Nuorgam
prošeaktabargi
040 723 9455
emmi.nuorgam@utsjoki.fi