Ohcejohka Šearrá kulturfestivála prográmma lea almmustahtton – maiddái sámegielat diktafestiválii gávdnui ruhtadeapmi

5.5.2025

Ohcejohka Šearrá kulturfestivála prográmma lea almmustahtton, prográmmii beasat oahpásmuvvat dákko.

Kulturruđaid čuohppamiin fuolatkeahttá maiddái Gáregasnjárggas ja Njuorggámis fállojit máŋggabealat prográmmat. Sámegielat diktafestivála ordnejuvvo Buolbmátjávregáttis duorastaga 3.7.2025 dii. 18 rájes. Diktafestiválas jitnii besset Inger-Mari Aikio, Jávrri-Juhán Niillas, Niillas Holmberg, Saia Stueng ja Beaska Niillas. Diktafestiválas lea maid rabas mikrofovdna. Diktafestivála ruhtada Kulturguovddáš Kattila.

Geassebeaivi Gáregasnjárggas -dáhpáhus ordnejuvvo Gilidállu Sáivvu šiljus bearjadaga 4.7.2025 dii. 13 rájes. Geassebeaivi Gáregasnjárggas -dáhpáhusas leat ollu olles bearraša prográmmat. Musihkas vástidit Gáregasnjárgga mánát oktan Suvi Niittyvuopioin ja Allsång på Gáregasnjárga, mas lávlut sámegielat oktasašlávlagiid Terje Tretnesa jođihemiin. Beaivvi áigge sáhttá návddašit vietnamlaš borramuša. Mánáide leat maid bagadallon doaimmat ja ovdanbuktin. Geassebeaivi Gáregasnjárggas -dáhpáhusa ruhtada Leader-ruhtaduvvon Gávcci jagiáiggi dáhpáhusat -prošeakta ja Ohcejoga gielda.

Lávvardaga 5.7.2025 Gieddemielli dearpmi alde ovdanbuktet dánge jagi sámekultuvrra supernásttit. Festiválas ovdanbuktet Ella Marie, Petra Laiti, Lávre, Laura Tapiola, Semen Bolshunov, Sámi Jienat, Aleksi Ahlakorpi sámegielat stan-upain ja Ritni Ráste Pieski ovttas bargojoavkkuin Girjái dekolonialisttalaš queer-utopiijain. Eahket joatkašuvvá Loktafeastta prográmmain ijahis idjii, mii lea deattuhuvvon ráp-musihkain. Loktafeasta -festiválii ii leat ahkerádji, muhto dan alkoholavuovdinguovllu ahkerádji lea 18 jagi.

Searvvit, fitnodagat ja eará doaibmit sáhttet almmuhit dáhpáhusaid kulturvahkkui maŋimustá 30.5.2025. Buot vahkkui almmuhuvvon dáhpáhusat almmustahttojit kulturfestivála neahttasiidduin.

 

Lassedieđut:

Kaisa Tapiola-Länsman

asttuáiggečálli

kaisa.tapiola-lansman@utsjoki.fi

0400 319 852

 

Selja Puolitaival

Prošeaktabargi

selja.puolitaival@utsjoki.fi

040 723 9455

Ruovttoluotta