Päivi Kontio: Mii dárbbašat luohtehahtti gulahallanbálvalusaid – maiddái dáppe davimus Suomas

Johtolat- ja gulahallanministeriija
Traficom

Buot golaheaddjiin ja fitnodagain lea vuoigatvuohta oažžut gulahallama vuođđobálvalusaid ruoktot dahje fitnodahkii. Traficom lea nammadan Telia Ohcejoga guovllu telefon- ja govdafierpmádatlavtta vuođđobálvalusfitnodahkan. Telia galggašii fuolahit doaibmi telefonoktavuođaid buohkaide ja uhcimustá 5mbs dáhta sirdinvejolašvuođa.

Dáppe Suoma davimus gielddas Ohcejogas leat buorit telefon- ja diehtojohtolatoktavuođat hui dehálaččat. Mis lea guhkes mátki juohke beallai, nu ahte ovdamearkka dihte heahtediliin veahkkige lea guhkkin. Ná oktavuođaid doaibman lea juoba eallima ja jápmima gažaldat. Maŋimuš áiggiid gielddaolbmuin, fitnodatdoalliin ja turisttain leamašan váttis luohttit dasa, ahte oktavuođat doibmet. Maiddái mánáid oahpahus lea šaddan váttisin, dasgo mearkkašahtti oassi oahppamateriálas gávdno dušše digihámis ja čakčat Skállovári bigálusskuvla čađahuvvo diliin, main gulahagas ii leat diehtuge.

3G-fierpmi heaittiheami maŋŋá váikkuhusat oktavuođaid dássái ja viidodahkii leamašan dramáhtalaččat erenomážit bieđggoássanguovllus, maiddái mis Ohcejogas. 3G-fierpmi heaittiheapmi lea dagahan mearkkašahtti váttisvuođaid erenomážit guovlluin, gos 4G- ja 5G-fierbmi doaibmá ain váilevaččat.

Máŋggat geavaheaddjit, maiddái boarrásat, Deanuleagi ássit ja gielddaolbmot oppalohkái dáppe Ohcejogas, leat deaividan stuorra váttisvuođaid beaivválaš doaimmaineaset, go telefon- ja dáhtaoktavuođaid luohtehahttivuohta lea čielgasit hedjonan. Dát čuohcá gieldalaččaid eallimii, fitnodagaid doaimmaide ja bálvalusaid fitnašuvvamii. Buot dáid áššiin lea mearkkašupmi maid doalahan- ja geasuhanfámu dáfus.

Erenomážit dihto boaittobeale guovlluin, gos 3G-fierbmi lei áidna doaibmi molssaeaktu, váilot dál luohtehahtti gulahallanbálvalusat, mii áitá juo olbmuid dorvvolašvuođa ja buresveadjima. Lea dehálaš, ahte johtolat- ja diehtojuohkinministeriija váldá vuhtii dáid guovlluguovdasaš earuid ja doaibmagoahtá dan ovdii, ahte buot riikkavuložiin leat luohtehahtti gulahallanbálvalusat.

Evttohan, ahte ministeriija guorahallá vejolašvuođaid doarjut ja ovddidit firpmiid viidodaga ja dási erenomážit guovlluin, gos oktavuođat leat hedjonan 3G-fierpmi heaittiheami geažil. Dát sáhtášii sisttisdoallat investeremiid infrastruktuvrii sihke doarjagiid operáhtoriidda buoridit bálvalusaideaset.

Oaiveministtar Orpo ráđđehusprográmmas daddjojuvvo, ahte gielddaide dorvvastuvvo guovddáš rolla suopmelaš servodagas ja almmolaš hálddahusas. Dán rolla doalaheapmi eaktuda goit doaibmi oktavuođaid ja vejolašvuođa ovddidit maid gulahallanbálvalusaid. Dorvvolašvuođa perspektiivvas dilli ii sáhte leat nu, ahte boaittobeale guovllut vajálduhttojit oalát ja go bohtet váttisvuođat, daid divvun orru leamen hui váttis.

Sávan, ahte johtolat- ja diehtojuohkinministeriija váldá ášši duođas ja doaibmagoahtá dan ovdii, ahte buot suopmelaččain, maiddái dáppe davimus guovllus Lappis, livččii vejolašvuohta luohtehahtti gulahallanbálvalusaide.

Ohcejogas 24.3.2025

Päivi Kontio
Gielddahoavda
040 744 7630
paivi.kontio@utsjoki.fi