Turku universitehta, Ohcejoga gielda ja Sámediggi nanusmahttet iežaset ovttasbarggu

Turku universitehta, Ohcejoga gieldda ja Sámedikki oktasaš ulbmilin lea árktalaš guovllu nuppástusa ja máŋggahámatvuođa dáfus guovddáš temáid dárkun. Konkrehta ovdamearka ovttasbarggus lea oahppolágádusovttasbargu Turku universitehtain ja Ohcejoga logahagain, mii dál ovddiduvvo.

Turku universitehta rektor Marjo Kaartinen, Ohcejoga gielddahoavda Päivi Kontio ja Sámedikki ságadoalli sadjásaš Tuomas Aslak Juuso vuolláičálle ovttasbargosoahpamuša maŋŋebárgga 24.6.2025 Poris.

Soahpamuššii lea girjejuvvon guđege oassebeali oktasaš dáhttodilli guhkesáigásaš ovttasbargui ja guoibmevuođa ovddideapmái dutkama ja skuvlema ja maid ovddidan- ja váikkuhanprošeavttaid bokte.

Skuvlema oasil mihttomearrin lea máŋggahámat oahppolágádusovttasbargu Ohcejoga logahaga ja Turku universitehta gaskkas. Ođđalágan, rájáid rasttildeaddji skuvlenovttasbarggus iskat earret eará lasihit allaskuvlejumi geasuhahttivuođa.

Dutkama oasil guovddáš temáid lea ulbmil smiehttat ovttas ja daid dutkamii ohcco ruhtadeapmi ovttas.

Ovttasbargu ja álgomuttus erenomážit oahppolágádusovttasbargu huksejuvvo árktalaš guovllu nuppástusa ja máŋggahámatvuođa birra. Olbmo doaibma, dábit, árbevierut, ealáhusat, giella ja kultuvra laktásit vástideaddji láhkai birrasa, dálkkádaga ja luonddu máŋggahámatvuođa nuppástussii ja maid nuppástuvvi geopolitihka dagahan hástalusaide.

Ulbmilin lea dárkut viidát nuppástuvvi luonddubirrasa, kultuvrra ja servodaga ja maid ealáhusdoaimma vuorrováikkuhusa ja árktalaš guovllu rolla globála ovdáneamis.

– Lahkonit oppalašvuođa Turku universitehtii mihtilmas vugiin máŋggadieđalaččat ovdamearkan luonddudieđalaš, kultuvrralaš ja geopolitihkalaš geahččanguovllus. Turku universitehtas lea guhkes árbevierru árktalaš guovllu nuppástusa čuovvundutkamis, ja Geavu dutkanstašuvnnas lea dás guovddáš bargu, rektor Marjo Kaartinen muitala.

– Ohcejoga gielddas doallat hui dehálažžan, ahte mii bastit fállat min studeanttaide ođđa vejolašvuođaid čiekŋudit iežaset logahatoahpuid. Mun jáhkán, ahte dánsullasaš máŋggasuorggat ovttasbargu addá oskku boahttevuhtii maiddái gieldda oainnus ja dahká vejolažžan buoremus dilis buktit dutkama ja diehtaga konkrehtalaččat gieldda olbmuid ja earáid olámuddui, ja seammás lasiha olbmuid diđolašvuođa nuppástuvvi birrasis, Ohcejoga gielddahoavda Päivi Kontio dadjá.

– Livččii fiinnis, ahte mis livččii boahttevuođas fágaidrasttildeaddji, árktalaš eamiálbmotmáhttinguovddáš, gos mii sáhtáleimmet ovttasbarggus ovddidit dutkama, mii bálvala sámeservoša ja dan dárbbuid. Dálkkádatnuppástustemáid lassin sáhtáleimmet doarjut sápmelaš fitnodatdoaimma buvttademiin dieđu, mii vuhtiiváldá sámeealáhusaid máŋggalágan dárbbuid ja ovddida innovašuvnnaid eallinfámu nannemii, Sámedikki ságadoalli sadjásaš Tuomas Aslak Juuso gávnnaha.

Lassedieđut:
rektor Marjo Kaartinen, Turku universitehta, 040 523 4722
gielddahoavda Päivi Kontio, Ohcejoga gielda, 040 744 7630
ságadoalli sadjásaš Tuomas Aslak Juuso, Sámediggi, 040 687 3394