Stuorra oassi Ohcejoga ássanbáikkiin lea Deanogáttis. Nuppe bealde Deanu lea Norga, man fiinna vánddardanbáikkiide lea álki beassat Ohcejogas. Ohcejoga rádjaránnján lea Norgga davimus, viidodaga dáfus stuorámus ja ássiid logu dáfus unnimus Finnmárkku leatna. Ohcejoga ránnjágielddat Norgga bealde leat Kárášjohka, Deatnu ja Unjárga – dárogillii Karasjok, Tana ja Nesseby. Ohcejogas lea álki oahpásmuvvat Davvi-Norgga fiinna luonddubáikkiide. Maiddái Norgga árgabeaivválaš bálvalusaid, dego vuoktačuohppi ja šibitdoaktára bálvalusaid lea álki oažžumis.

Buot Ohcejoga ránnjágielddain sáhttá oahpásmuvvat sámekultuvrii museain. Dát leat Kárášjoga sámemusea Sámiid Vuorká-Dávvirat, Deanu gielddas Buolbmága Deanu Musea dušše 2,5 kilomehtera Suoma riikkarájás, sámedáidaga musea Savio-musea ja nuortalaččaid musea Ä´vv Saa´mi Mu´ze sihke  Unjárgga sámemusea Vuotnabađas Várjjat Sámi Musea. Vuotnabađas lágiduvvojit borgemánu maŋemus lávvardaga sámi márkanat Vuonnamárkanat.

Norgga rájá sáhttá rasttildit Gáregasnjárggas, Ohcejogas ja Njuorggámis Juohke gilis lea tuollokantuvra. Jos don mátkkoštat beatnagiin dahje eará biebmoealliin, de gávnnat áigeguovdilis njuolggadusaid  Pohjoismainen yhteistyö dahje Ruokavirasto siidduin.

Eanet dieđuid guovllu birra gávnnat Finnmárkku guovllu turismasiidduin Destination Sápmi. Norgga olgolihkadanbáikkit, vánddardanmáđijat, stobut ja oalgebálvalusat gávdnojit ut.no-siidduin. Vánddardanmáđijat gávdnojit maiddái Finnmárkku Friluftsråd bájásdoallan Perletur-siidduin.

Karasjok

Kárášjohka, dárogillii Karasjok ja suomagillii Kaarasjoki, lea Gáregasnjárgga ránnjágielda Ohcejoga viesttar ránnjá. Gáregasnjárggas lea dušše 19 kilomehtera Kárášjoga gieldda guovddážii. Kárášjohka lea Norgga Sámedikki guovddášbáiki. Kárášjogas sáhtát joatkit E6 luoddaráigge davás guvlui, Porsáŋgguvutnii ja das viestarii, Áltái, dahje joatkit E69 luoddaráigge davás, Nordkáhppii. Nordkáhppa lea davimus báiki Norggas ja Eurohpás gosa beassá luoddaráigge.

Tana

Deatnu, dárogillii Tana ja suomagillii Teno lea Ohcejoga davimus rádjáránnjá. Dan hálddahuslaš guovddáš ja áidna čoahkkebáiki lea Deanušaldi, gosa lea 27 kilomehtera mátki Njuorggámis. Deanu gielda lea maid Ohcejoga gili buohta Deanu nuppe bealde. Deanovuotna, dahje vuotna gosa Deatnu luoitá, lea Deanu gielddas. Finnmárkkus leat máŋga fiinna váldomeara hábmen jorbageađgegátti, main beakkánamos, Luovttat, lea Deanovuona gáttis.

Nesseby

Unjárga, dárogillii Nesseby ja suomagillii Uuniemi, lea nuorttamus Norgga beale Ohcejoga ránnjáin. Ohcejogas lea dušše oanehis eananrádji Unjárggain, ja dohko beassá go manná Deanu gieldda bokte. Várjavuona bahta lea Unjárggas. Gieldda hálddahus- ja guovddášbáiki lea Vuotnabahta. Vuotnabahtii lea Ohcejoga gilis 78 kilomehtera ja Njuorggámis dušše 35 kilomehtera. Unjárgga gielddas leat ollu fiinna olgolihkadangeinnodagat. Unjárggas sáhttá joatkit mátkki E75 luoddaráigge Várggáide dahje E6 luoddaráigge Njávdámii ja gitta Girkonjárgii. Girkonjárggas sáhtát čuovvut uhcit luottaid Norgga nuortalulimus sadjái, Vuorjánjoga rádjái.

Earálágan doaimmaid ja bálvalusaid birra gávnnat dieđu Visit Varanger siidduin.

Kárta: Store norske leksikon