Niibe- ja čikŋaduojár Gáva-Jon Ilmár Ilmari Tapiola − 50-jagi eallinbargu bálkkašuvvo Pro Finlandiain

Badjeolmmoš ja niibe- ja čikŋaduojár Ilmari Tapiola vuostáiváldá ovdal juovllaid Suomen Leijonan Pro Finlandia -medálja. − Jáhkkemeahttun, lohká Ilmari Tapiola. – Ahte lean válljejuvvon guovttenuppelogi beakkán dáiddára jovkui, mas leat mielde neavttárat, bagadallit ja operalávlut ja eará beakkálmasat. Medálja lea stuorra gudni.

Ilmari árga juohkása boazobargguid ja duoji gaskka. − Lea vuogas beassat molssodit iešguđet bargguid gaskka. Barggan bohccuiguin ja go dat barggut eai leat de beasan vuodjut duddjot čoarvvis ja muoras čiŋaid ja atnugálvvuid.

Ilmari álggii gazzat duojároahpu 1970-logus Anára kristtalaš álbmotskuvllas, gos oahpaheaddjin leigga Ilmari Laiti ja Juhan Rist. Maŋŋá son studerii moadde jagi Johkamohkis álbmotallaskuvlla duodjesuorggis, man oahpahii Per-Ola Utsi. − Liikojin studeret go oahput ledje geavatlaš barggut, iige teoriija lean jur ollenge. Studeremii dárbbašuvvui maiddái ruhta, muhto Ilmari Laiti veahkehii ordnet ruhtadeami. Ožžon veahkkeruđa earret eará Zonta-nissoniin.

Bargguidis Ilmari Laiti duddjo bohccočorvviin ja soahkebáhkiin, main son duddjo giissáid, lihtiid, niibbiid ja čiŋaid. − Álggahin báhkkeguvssiin ja niibbiin, čiŋaid lean álgán duddjot maŋŋá. Mu dujiide lea mihtilmas mu iežanlágan hábmen ja valjes herven. Hearvvain leat bárggáldagat, bohccot, násttit ja beaivváš. Cehkkojuvvon hearvvaid oaččun čuvges čoarvvis oidnosii ovdamearkka dihtii činain.

Ilmari herve čoarvedujiid dávjá ruovttustis bargolanjas, muhto sierra bargosadji lea ruoktošiljus.  – Lean ovdal áiggiid ávkkástallan fitnodatdoarjagiid, go ožžon 1990-logus veahkkeruđa bargosaji huksemii ja muhtin bargomášeniidda.

Dujiid ii dárbbaš márkanastit, olbmot gal ostet daid muđuige. – Čiŋat ja atnugálvvut leat vuovdin láhkai Siiddas ja Sámi Duojis ja ollugat ostet daid maiddái mus njuolga.

Ilmari Tapiola bargguid leat oastán iešguđet museaide ja su barggut leamašan čájáhusain Budapest álbmotdáidaga museas ja Sámemusea Siiddas. Dan lassin Ilmari leamašan mielde máŋggain oktasaščájáhusain eará sámeduojáriiguin. Ilmari dujiid leat ožžon earret eará Tarja Halonen ja Alexander Stubb guimmiineaskka ja Dalai Lama Sámi galledemiid oktavuođas.

− Lean duddjon jo birrasii vihttalogi jagi. Dalle go mánát ledje unnit, ii lean nu olu áigi duddjot.  Dál astá buorebut go ii beasa guolástitge. Ealáhahkii in áiggo báhcit, vaikko leange jo dan agis, dadjá dán jagi 70 jagi deavdán Ilmari.