Nuorgamin Lomakeskus investere moadde miljon euroin - “Ruovttulágan vuoigŋa seailu”
Njuorggámis begget buorre ságat. Nuorgamin Lomakeskus lea investeren ođđa barttaide, safárivistái, eanalieggasii ja beaivvášenergiijai. Lomakeskus lea maŋimuš oastán ovddeš rádjestašuvnna giddodagaid, maid áigot divodit ja ordnet ođđaáigásaš ássanvistin iežas bargiide ja maiddái earáide, geat dárbbašit vistti.
Ođđa visttit buoridit kvalitehta
Bearašfitnodaga Raimo ja Eemeli Hekkanen ja Marjatta Holmberg leat čielgasit duđavaččat investerenmearrádusaide. FItnodagas leat aiddo ollašuhttán buolvvamolsuma ja ovddasvástádus lea sirdásan Eemelii.
– Mii háliidat ovddidit Lomakeskus doaimma ja leat dál beassan ovddidit máŋga ášši, sii golmmas illudit. – Stuorrun leamašan min mihttomearri muhto dat dahkko lihkká nu, ahte báikki ruovttulágan vuoigŋa seailu. Bargit galget leat doarvái, vai mii beassat bálvalit áššehasaid nu persovnnalaččat go lea vejolaš.
– Mii leat bargan feara maid, dadjá Eemeli Hekkanen go muitala investerenbargguin. – Leat leaikkastallan ahte buot álggii das, go Marjatta háliidii molsut oaivevistti lássaliinniid. Ođđa lássaliinniid várás galggai vehá ordnet seinniid, ja nu prošeakta viiddui restoráŋŋasále divodeapmái, vai dohko čágašedje stuorat joavkkut. Dál midjiide čáhket sullii 60 olbmo oktanaga seamma sadjái.
– Ođđa idjadansajiin niegadedje juo ovdal korona. Jagi 2019 gerge hukset guokte johgáddebartta, muhto álgoálggus plánejuvvon vihtta lassebartta báhce dalle huksekeahttá. Korona áigge huksengolut divro nu olu ahte ii gánnehan álgit hukset. Korona maŋŋá bohte Ukraina soahti ja máilmmiviidosaš eahpesihkar ekonomiijadilli, mat loktejedje reantodási mealgat.
Ođđa safáridállu lei álgoálggus plánejuvvon olu stuorábun, muhto plána gáržžidedje ja dál gárvvásmuvvan 200-njealjehasa visttis leat áššehassajit, čoahkkinsadji, sajit ofelaččaide, gálvorádjui- ja divodeapmái. Safáridálu 750 000 euro investeremii oaččuimet ruhtadeami Ely-guovddážis ja báŋkkus, ođđa barttaid 940 000 euro investeremii oaččuimet ruđa Finnveras ja Ely-guovddážis.
– Safáridálu ja ođđa barttaid huksenbarggut leamašan mu ovddasvástádus, lohká Eemeli Hekkanen. – Ođđa ideat bohciidit olles áigge. Ovddideapmi joatkašuvvá maiddái boahttevaš jagiid ja boarrásut barttaid sadjái bohtet ođđa barttat. Guovllu boarrásamos bartta lea Marjatta áhčči huksen 75-jagi dassái, nu ahte dál lea áigi ođasmahttit.
– Stuorruma ohcat kvalitehta buoridemiin, ii nuge idjadansajiid lasihemiin. 60 seaŋgabáikki leat dássážii buorre mearri, vai mii sáhttit seailluhit ruovttulágan vuoiŋŋa.
Govva: Nuorgamin Lomakeskus
Energiijačovdosiid bokte sestet ja vástidit brándalohpádussii
Giddodagaid huksema lassin Nuorgamin Lomakeskus lea investeren eanalieggasii ja beaivvášenergiijai.
– Vásttolut energiijabuvttadeapmi vástida maiddái fitnodaga brándalohpádussii ja dain birasustitlaš dábiin ja daguin lea stuorra mearkkašupmi maiddái fitnodaga márkanastimis, lohká Raimo Hekkanen. – Dán áigge turisttat giddejit ain eanet fuomášumi turismafitnodagaid biras- ja vásttolašvuođa áššiide ja suvdilisvuhtii, ja danin mii maid galgat bidjat dáidda návccaid.
– Beaivvášenergiija ja -panelaid gánnáhahttivuhtii skábmaáigge eai láve jáhkkit, muhto jo dál oanehis vásáhusa vuođul sáhttá lohkat, ahte panelat leat buvttadan eanet go maid rehkenasttiimet ovddalgihtii. Mis lea visttiid gáhtuid alde measta 170 panela ja 100 kW báhtterat, mat vurkejit energiija, mii šaddá čuvgesáigge. Dainnage seastá juo olu, jus oasi elrávnnjis sáhttá buvttadit ieš.
Guossit bohtet ođđasit
Guossit loktet Nuorgamin Lomakeskusis. Njuorggámis luomustallet “vehá nugo ruovttus muhto guossin, geatnegasvuođaid haga”.
– Dát oidno das ahte máŋggat guossit bohtet ođđasit ja buktet mielde ustibiid, bearraša ja fulkkiid, muitala Marjatta. – Ruovttulágan vuoigŋa ja bálvalus, mii duođas váldá gussiid vuhtii, roahkasmuhttá gussiid muhtimin muitalit sin iežaset eallinvásáhusaid birra.
Goalmmát buolva jođihit fitnodaga
Marjatta Holmberg mielde fitnodagas leat álgán hállat buolvvamolsumis jo logemat jagi áigi, go mánát ledje vuollel guovttelot jahkásaččat. Oamasteaddjimolsuma válmmaštallamii leat ožžon doarjaga Leaderis, ja dan vehkiin leat sáhttán buhttet áššedovdibálvalusaid.
– Eemeli lea bajásšaddan dáinna fitnodagain ja son lea bargan buot lágan bargguid dáppe. Son lea maŋimuš jagiid vástidan ollásit aktivitehtain ja ofelaččaid jođiheamis, muitala Marjatta. – Dan dihtii son dovdá bures fitnodaga doaimmaid ja resursagáibádusaid. Moai besse Raimoin ráfis luohttit dasa ahte guolmmát buolva birge turismafitnodatdoallin Njuorggámis.
– Buolvva molsumii leat ráhkkanan Ely-guovddáža áššedovdiin, go mis leamašan jahkeviissáid seamma čeahpes fitnodatkonsulta Oili Myllykangas rávvemin fitnodaga ovddidemiin, muitala Eemeli. – Proseassa leamašan jođus jo guhkit áigge. Guoibmán Elli boahtá skihpárin joatkit fitnodaga, mii maiddái veahkeha juohkit ovddasvástádusa ja bargomeari. Ja váhnemat leat lohpidan veahkehit moadde jagi jaskes dieđu sirdimiin.
– Mii háliidat bargat vel earáge go dán 120-proseantta fitnodateaiggáduššama, lohkaba Marjatta ja Raimo. – Nu guhká go bisso dearvvasin de návddašetne ođđa friijaáiggis.
Eemelis leat olu ođđa jurdagat mo ovddidit fitnodaga.
– Dáláš sesoŋŋaid galggašii sáhttit guhkidit, vai basttášeimmet bálkáhit bargiid birra jagi, sávvá Eemeli. – Mis leat dál birra jagi guokte bearraša olggobeale bargi ja sesoŋŋaáigge mii leat oktiibuot 12:s. Dál badjel bealli min bargiin ásset Njuorggámis fásta. Mii háliidat bastit boahtteáiggis fállát ain eanet barggu birra jagi. Dan ovdii galgá ovddidit aktivitehtaid, vai buđaldusat reahkkájit guhkit orrumii iešguđet jagiáiggiid.
– Vaikko hástalusat gávdnojit ovdamearkan guolástanturismma dahje máđijaid ovddideamis, jáhkán ahte mii nagodat fállat min gussiide fiinna ja áidnalunddot luopmovásáhusa Suoma davimus gilis.
Govva: Nuorgamin Lomakeskus