Ohcejohka
Ohcejoga hálddahuslaš guovddáš ja stuorámus gilli
Utsjoen kirkonkylä – Ohcejohka
Girkosiida lea Ohcejoga hálddahuslaš guovddáš. Girkosiiddas gávdnojit buot gieldda almmolaš bálvalusat, buresveadjinguovddáš, bálvalanássan, bátnedoavttir ja sosiálasuorggi bálvalusat, elektrovnnalaš sosiála- ja dearvvasvuođabálvalusaid Virtu-bálvalusbáiki ja Kela áššiiddikšunbáiki. Dasa lassin bálvalusaideaset fállet máŋggat sierra surggiid fitnodatdoallit. Girkosiiddas lea Osuusbáŋkku kantuvra, Avvila apotehka bálvalanbáiki, Poastta ja Matkahuolto bálvalanbáikkit sihke Alko diŋgonbáiki. Anára gieldda šibitdoavttir fitná jeavddalaččat Ohcejogas.
Girkosiiddas lea vejolašvuohta máŋggabealat astoáiggedoaimmaide miehtá jagi. Máŋggaid sis- ja olgolihkadanvejolašvuođaid lassin gilis leat earet eará Suoma davimus girjerádju, vuojadanhálla, 18-bána frisbeegolfgeainnus, gáddespábbadoaškungieddi ja filbmasále. Astoáiggesearvvit, searvvit ja rávesolbmuidskuvla ordnejit doaimmaid gieldda ássiide. Gili olbmuin lea vierrun čoahkkanit gilisearvvi doallan Giissá kafeai. Giliviesus vuvdet maiddái báikkálaš dujiid. Gilisearvi muitala doaimmastis ja dieđiha áigeguovdilis áššiin Facebook-joavkkus Ohcejotnjálmmi gilisearvi rs ja Instagram:is geavaheaddjinamain @utsjoenkylatalogiisa.
Ohcejoga girkosiiddas luondu lea lahka. Áiligas-duottar ceaggá Ohcejoga gili bálddas 342 mehtera allošažžan ja dan alde leat čáppa oidnosat Deanu ja Ohcejoga johkalegiide, Gálddoaivvi ja Báišduoddara meahcceguovlluide ja Ohcejoga girkosiidii. Áiligasa ala beassa álkidit priváhtageainnu mielde. Geaidnolobiid vuvdet Giliviessu Giissás. Sámešaldi mielde gilis beassá Deanu rastá Norgga beallái.
Máttajávrri gáttis leat leat Ohcejoga girku, báhppal ja girkostobut, Bassi Ulriika sáhkát sihke boares hávdeeana ja šiljogieddi. Historjjálaš guovlluid sáhttá maid vásihit go váccaša sullii guokte kilomehtera guhkes Ulrika bálgá, mii álkivuođa geažil heive oba bearrašii.
Dálvit lahkaduottariid dápmot- ja rávdočázit giktalit dálveoaggumii. Girkosiiddas ja dan lahkosis vulget luonddubálgát ja vánddardanbálgát, gos lea vejolaš lotkkodit. Doppe sáhtát vánddardit ráfis – muhtin diimmu dahje vaikko máŋga beaivvi.
