Logahatoahppi Leo fárrii Mátta-Suomas davás čieža jagi dassái: “Ohcejoga buoremus bealit leat ráfálašvuohta, lotkes eallin ja mohtorgielkkáin vuodjin”
Govva: Meri Luoma / Ohcejoga gielda
Leo Laukkanen lea 19-jahkásaš logahatoahppi, guhte geargá dán vahkus Ohcejoga sámelogahaga goalmmát luohkás. Savonlinnas riegádan Leo fárrii bearrašiinnis Ohcejoga Njuorggámii čieža jagi dassái go eadnis oaččui barggu Norgga bealde. Bearaš lei áigon orrut davvin dušše jagi, muhto sii loktege dan meare bures ahte mearridedje báhcit davás.
– Mii hálideimmetge báhcit deike go dáppe lei nu somá. Dat lei maiddái mu iežan mearrádus, ledjen gal sáhttit máhccat máttás. Hálidin goittotge vázzit skuvllaid dáppe lohppii ja ledjen gávdnan maiddái skihpáriid dáppe.
Ohcejogas Leo geasuhit erenomážit luondu ja davi lotkes eallin.
– Dáppe ii leat hoahppu gosage. Dat heive munnje hui bures. Liikon maiddái leat luonddus, guolástit, bivdit ja vuojašit gielkkáin. Dan ii sáhte bálljo dahkat eará sajis, logahatoahppi smiehtada.
Govva: Leo Laukkanen
Njuorggámis Leo fárrii badjelaš 40 kilomehtera geahčai Ohcejoga girkosiidii go logahat álggii. Guokte vuosttas jagi son orui skuvlla ásodagas, muhto dál son orru iežas visttis.
– Ásodagasge lei áibbas suohtas orrut, muhto galhan dat lea somá go lea iežas visti.
Govva: Meri Luoma / Ohcejoga gielda
Studerema lassin Leo bargá báikkálaš fitnodagas.
– Barggan Pub Rastigaisas vahkkoloahpaid ja muhtumin maiddái árgabeivviid. Barggan restoráŋŋabargin ja steikken pizzaid. Mun liikon hui olu iežan bargui. Dáppe measta buohkat dovdet nuppi nuppi, buohkat liikojit háleštit muinna ja mun háleštan buohkaiguin. Das boahtá dovdu ahte munnje liikojit dáppe. Muhtumin bargu ii oba oroge bargu, muhto dakkár somás olbmuiguin ovttastallan.
Leo lea loaktán bures maiddái Ohcejoga sámelogahagas.
– Smávva joavkkus lea álkkit oahpásmuvvat earáide ja oahpaheaddjit lea somát. Mis lea buorre joavku ja skuvllas oažžu individuála oahpahusa.
Naba báhcágo nuorra albmái astoáigi skuvlavázzima ja bargguid maŋŋá?
– Nugo eske máinnašinge, dálvit liikon vuojašit iežan gielkkáin. Duollet dállet lean maid fitnan ealgabivddus. Astoáigge liikon fitnat maiddái vuojadeamen ja álšasáles, ja muhtun veardde maiddái spealan dihtorspealuid, muitala Leo.
Leos leat maiddái joksanmearit ja olahusat lihkadeami hárrái.
– Lokten beaŋkkas dál 92,5 kg ja áigumuššan lea nákcet 100 kilo!
– Mun lean maiddái dahkan báikkálaš frisbeegolfluotta olahusa, Leo čaimmiha ja joatká, ahte frisbeegolf spelliide Ohcejoga luodda lea buorre luodda.
Govva: Meri Luoma / Ohcejoga gielda
Áigeájanasat gal Ohcejogas gávdnojit. Muhto mii lea Leo mielas buot buoremus ášši Ohcejogas?
– Mun liikon dán vuoiŋŋas mii dáppe lea, dakkár positiiva ja lotkat. Dáppe leat maiddái iežaslágan olbmot. Dan lassin Ohcejogas measta buohkat dovdet nuppi nuppi. Dasa gullet dieđusge buorit ja fuonit bealit, Leo himiha.
Luomuid áigge Leo láve johtit máttás álo go dat lea vejolaš.
– Fulkkiid ja oahppásiid dieđusge áibbašan ja máddin finan maiddái gávppiin.
Govva: Leo Laukkanen
Jus Leo govvidivččii Ohcejoga golmmain sániin, dat livčče lotkat, smávva ja seammás maiddái saddjái.
– Dáppe dus lea sadji leat, Leo čielggada.
Ohcejoga guovllus jo čieža jagi loaktán Leo jurddaša ahte sáhtášii vejolaččat orrut Ohcejogas maiddái boahttevuođas.
– Čuovvovaččat áiggun geargat logahagas ja dan maŋŋá čađahit soahteveaga Soađegilis. Soahteveaga maŋŋá várra máhcan deike muhtin áigái ovdalgo vuolggan studeret. Muhto gal mun sáhtášin máhccat deike vel maŋŋelis, dalle go lea dan áigi, Leo pláne.
Maid Leo hálidivččii dadjat su ahkásaččaide, geat kánske smihttet Ohcejohkii fárrema dahje studerema sámelogahagas?
– Dáppe loaktá hui bures jus boahtá dakkár mielain ahte lea gárvvis háleštit earáiguin ja oahpásmuvvá olbmuide. Jus dáppe lea áibbas okto de dalle gal ii várra loavtte nu bures. Gánneha maiddái váldit rabas mielain vuostá ođđa áššiid ja oahpásmuvvat áigeájanasaide, mat dáppe gávdnojit, omd. olgun johtimii ja maiddái Ohcejoga idjaeallimii, Leo čaimmiha.
Leo, guhte lea vásihan ollu buriid Ohcejogas, čohkke vel jurdagiiddis ovtta cealkagii.
– Lean hui duđavaš dáppe inge leat gáhtan beaivvige ahte báhcen deike studeret!
Ohcejoga gielda buvttada Ohcejohkalaččaid eallin -muitalusráiddu, mas vuodjut olbmuid jurdagiidda ja vásáhusaide eallimis Suoma ja Eurohpa uniovnna davimus gielddas. Almmustahttit ráiddu ođđajagimánu 2023 rájes. Gávnnat buot almmustuvvan osiid dáppe!