Crossborder Business Lab čohkke Ohcejoga ja Anára ja lassin Norgga Nuorta-Finnmárkku ja Kárášjoga guovllu fitnodagaid ja doaibmiid miessemánu loahpas Norgga Buođggáide.

Nuppes ordnejuvvon guovttebeaivásaš Crossborder Business LAB lea oaivvilduvvon Ohcejoga ja Norgga Nuorta-Finnmárkku ja Kárášjoga guovlluid turismafidnošeaddjiide ja guovlluid ovddideami njunušolbmuide.

Dáhpáhusa ulbmilin lea fitnodatolbmuid rájárasttildeaddji fierpmádathuksen ja maiddái fitnodatolbmuid guhkesáigge strategalaš ovttasbargu: oktasaš ovddidanfidnut ja fitnodatdoaibmanvejolašvuođat.

Mannan jagi Crossborder Business LAB ordnejuvvui Ohcejogas. Dáhpáhussii bohte sullii 50 oasseváldi golmmalogi iešguđege fitnodagas ja organisašuvnnas. Máhcahaga mielde dáhpáhusa atne ávkkálažžan ja dárbbašlažžan. Lassin badjánedje ođđa ovttasbargojurdagat!

Dán giđa Buođggáide leat boahtimin fitnodagat ja doaibmit rájá goappat bealde. Vuordit miellagiddevaš ságastallamiid ja ođđa ovttasbargojurdagiid. Dáhpáhusa ordnenovddasvástádus lea dán jagi norgalaččain. Čáhcesullo ja Ohcejoga gielddahoavddat sávvet oassálastiide buresboahtima.

Dáhpáhusa ordnemis fuolahit Øst-Finnmarkrådet, Nordkyn, VisitKirkenes, Norske Parker ja Destinasjon Sápmi ja Ohcejoga gielda.

Dáhpáhusa siiddut

Lassedieđut:

Eallinfápmohoavda Tanja Lepistö
0400 151 294
tanja.lepisto@utsjoki.fi