Gielddahoavda Taina Pieski Kuntaliitto unna gielddaid fierpmádaga ságadoallegoddái
23.1.2023
Ohcejoga gielddahoavda Taina Pieski lea válljejuvvon Kuntaliitto (sá. Gielddaidlihttu) unna gielddaid fierpmádaga ođđa ságadoallegoddái.
Fierpmádaga ságadoallin jagi 2023 joatká Isojoki gielddahoavda Juha Herrala. Vuosttas várreságadoallin válljejuvvui vuosttas čoahkkimis 13.1. Ilomantsi gielddahoavda Marjut Ahokas.
Ságadoallejovkui válljejit juohke guovllus lahtu ja persovnnalaš várrelahtu. Joavkkus jotket Juha Herrala lassin Johanna Mäkelä, Marjut Ahokas ja Helena Vuopionperä-Kovanen. Ođđa lahttun válljejedje Pieski lassin Jarkko Sorvanto, Emilia Savolainen ja Pertti Severinkangas.
Unna gielddaid fierpmádat lea ságastallan-, ovdduidgohcin- ja ovddidanforum vuollái 10 000 ássi gielddaide. Fierpmádaga doaimma birra sáhttá lohkat eambbo Kuntaliitto neahttasiiddus (suomagillii).