Gielddaráđđehus mearridii bovdet guhtta evttohasa jearahallamii gielddahoavdda virgái
6.11.2023
Ohcejoga gielddaráđđehus mearridii otná 6.11. čoahkkimisttis bovdet guhtta olbmo jearahallamii gielddahoavdda virgái. Jearahallamiidda bovdejuvvojit formála gelbbolašvuođa deavdi ohccit: Marjut Ahola (hálddahusdiehtagiid magisttar, Ranua), Jarkko Autero (filosofiija magisttar, Espoo), Pekka-Tapani Heikkinen (bajásgeassindiehtagiid magisttar, Soađegilli), Maarit Heinonen (servodatdiehtagiid bajit ámmátallaskuvladutkkus, restonoma bajit ámmátallaskuvladutkkus, Posio), Sami Jalonen (soahtediehtagiid magisttar ja ovdaoffiseara, Kustavi) ja Päivi Kontio (hálddahusdiehtagiid magisttar, Ohcejohka).
Gielddaráđđehus lágida válljejuvvon ohcciid jearahallamiid vuossárgga 13. beaivve skábmamánu. Jearahallamiidda bovdejuvvojit maiddái buot váldostivrra áirasat.
Ohcejoga váldostivra mearridii čoahkkimisttis vuossárgga 23. beaivve golggotmánu máhcahit gielddahoavdda virggi deavdima ruovttoluotta gielddaráđđehusa válmmaštallamii. Gielddaráđđehus lei árat evttohan váldostivrii, ahte virgái eai jearahallojuvvo ohccit ja gielddahoavdan válljejuvvo hálddahusdiehtagiid magisttar, gieldda dálá buresveadjinhoavda Päivi Kontio, guhte lea addán virgái iežas miehtama. Váldostivra goittotge oaivvildii, ahte virgái galgá lágidit jearahallamiid.
Ohcejoga gielddahoavdda virgái leat leamaš evttohassan buohkanassii 32 ohcci ja okta miehtama addán olmmoš. Virggi jotkojuvvon ohcanáigi nogai 29. beaivve čakčamánu.
Ohcejohkii ohcet ođđa gielddahoavdda, daningo gielddahoavdan doaibman Taina Pieski sirdásii borgemánus Sámemusea Siidda museahoavdan.
LOGA ČOAHKKINBEAVDEGIRJJI
Sáhtát lohkat gielddaráđđehusa čoahkkima beavdegirjji dákko (suomagillii). Sámegiel beavdegirji almmustahtto jorgaleami maŋŋá dáppe.