Lappi buresveadjinguovllu davvisámegielat neahttasiiddut leat almmustuvvan
21.10.2024
Lappi buresveadjinguovllu neahttasiidduid davvisámegielat veršuvdna lea almmustuvvan geavaheaddjiide 21.10.2024. Neahttasiidduin gávnnat dieđu ja rávvagiid Lappi buresveadjinguovllu sosiála- ja dearvvašvuođabálvalusaid birra.
– Lappi buresveadjinguvlui lea dehálaš nákcet bálvalit iežas áššehasaid sámegillii. Neahttasiiddut leat máŋgasiidda vuosttáš lávki áššehasvuhtii Lappi buresveadjinguovllus, go ohcet dieđu bálvalusain. Lea dehálaš ahte mii sáhttit fállat álggo rájes dieđu bálvalusaid birra sámegillii, muitala sámegielat ja kulturmieldásaš bálvalusaid ovddidanhoavda Tuuli Miettunen.
Sámegielat neahttasiidduide lea juo guhká leamašan dárbu. Davvisámegielat veršuvdna dievasmahttojuvvo oppa áigge. Anáraš- ja nuortalašgielat veršuvnnat almmustuvvet maŋŋelabbos.
https://lapha.fi/sme/ovdasiidu
Sámi giellaláhka geatnegahttá buvttadit sámegielat bálvalusaid ja materiálaid
Lappi buresveadjinguovllus ordnejuvvojit bálvalusat njeallje gillii: suomagillii, davvisámegillii, anárašgillii ja nuortalašgillii. Bálvalusain dárbbašuvvojit iešguđetlágan sámegielat materiálat, dego áššehas- ja buohcceáššegirjjit ja iešguđetlágan rávvagat.
Mii figgat ordnet jorgalan- ja dulkonbarggu buresveadjinguovllu iežas doaibman, vai mii sáhttit unnidit oastinbálvalusgoluid. Lappi buresveadjinguovllu giellabargit jorgalit áššehas- ja buohcceáššegirjjiid, čoahkkináššegirjjiid ja beaivválaš dieđiheami. Giellabargiid joavku vástida maiddái áššehasdulkomiin ja čoahkkindulkomiin.
Mii atnit árvvus buot máhcahaga sámegielat neahttasiidduin ja sámegielat bálvalusain. Dat veahkeha min ovddidit iežamet bálvalusaid maiddái boahtteáiggis. Sáhtát addit máhcahaga čujuhusas https://link.webropolsurveys.com/S/72661F5C350B9072.