Ohcejoga gielddaráđđehus evttoha gielddahoavdda virgái Päivi Kontio
9.10.2023
Ohcejoga gielddaráđđehus mearridii otná 9.10. čoahkkimisttis evttohit váldostivrii, ahte gielddahoavdda virgái válljejuvvo hálddahusdiehtagiid magisttar, gieldda dálá buresveadjinhoavda Päivi Kontio. Kontio lei addán virgái iežas miehtama.
Gielddaráđđehus mearridii evttohit váldostivrii Kontio virgái njuolga, jearahallama haga jienaiguin 4–3. Vd. gielddahoavda Tanja Lepistö guđii mearrádusas sierraoaivila, daningo su mielas buorre hálddahussii livčče gullan jearahallat virgái buot formála gelbbolašvuođa deavdán ohcciid. Gielddahoavdda virgái leat evttohassan buohkanassii 33 olbmo. Virggi jotkojuvvon ohcanáigi nogai 29. beaivve čakčamánu.
Gielddaráđđehus attii maiddái váldostivrii evttohusaidis boahtte jagi boahto- ja giddodatvearroproseanttain ja erenomášluohkáoahpaheaddji virggi vuođđudeamis. Gieldda bázahusmáksotávssaid bajádusevttohusa gielddaráđđehus mearridii máhcahit eallinfápmo- ja teknihkalaš lávdegoddái lassečielggadeapmái. Dasa lassin gielddaráđđehus evttoha, ahte Ohcejoga gielda searvá Davvi- ja Nuorta-Lappi oktasaš barggolašvuođaguovllu vuođđudeapmái.
Váldostivra čoahkkana mearridit earret eará dáid áššiin vuossárgga 23. beaivve golggotmánu.
LOGA ČOAHKKINBEAVDEGIRJJI
Sáhtát lohkat gielddaráđđehusa čoahkkima beavdegirjji dákko (suomagillii). Sámegiel beavdegirji almmustahtto jorgaleami maŋŋá dáppe.