Álbmotdilálašvuohta norgalaš Davvi-bieggafápmofidnu lávvaplánas Ohcejogas gaskavahku 11.10.2023

Grenselandet DA pláne hukset Davvi-bieggafápmopárkka Norgii Finnmárkku duottarguvlui Davvesiidda gildii. Davvesiidda gielda lea gáibidan, ahte fidnui ráhkaduvvo areála lávvaplána, mas meroštallojuvvojit bieggafápmopárkii, geaidnolaktii ja guovllu siskkáldas geainnuide guoski ordnestallamat.

Suoma birasguovddáš lea vuostáiváldán Norgga birasvirgedoaimmahagas ON:id Eurohpa ekonomiijakommišuvnna stáhtaid rájáid rasttildeaddji birasváikkuhusaid árvvoštallamii guoski almmolašsoahpamuša (Espoon sopimus – Espoo soahpamuš) mieldásaš almmuhusa, mii guoská Davvi-bieggafápmopárkka areála lávvaplánii. Suoma virgeoapmahaččain, ássiin ja servošiin lea vejolašvuohta addit cealkámušaid ja ovdanbuktit oaiviliid gullanmateriála birra. Máhcahagaid sáhttá doaimmahit Suoma birasguovddážii 20.10.2023 rádjai. Gullama ja cealkámušaid čohkke Suoma birasguovddáš, mii lea Espoo soahpamuša ja SEA-beavdegirjji doaibmaválddálaš virgeoapmahaš Suomas.

Lávvaplána ulbmilin lea dahkat vejolažžan bieggafápmopárkka, man ovttadatbeaktu lea eanemusat 800 megawáhta (MW) ja hukset dasa laktáseaddji infrastruktuvrra. Lávvaguvlui plánejuvvojit eanemusat 160 bieggaturbiinna, mat livčče eanemusat 200 mehtera alladat. Árat fitnodat plánii hukset fápmojohtasa Supmii, muhto dán plánas fitnodat lea geassádan. Dál bieggafápmopárkka áigot laktit guvlui plánejuvvon ođđa 420 kV fápmojohtasii gaskkal Skáidi–Áttánjohka. Dasa lassin bieggafápmopárkka sajádat lea sirdojuvvon davvelabbui go ovddit plánas.

Suoma birasguovddáš lágida lávvaplána birra álbmotdilálašvuođa Ohcejoga gielddaviesus (Luossa 1 a, 99980 Ohcejohka) gaskavahku 11.10.2023 dmu 17–20. Káfestallan dmu 16 rájes. Dáhpáhussii ii dárbbaš dieđihit ovddalgihtii. Dilálašvuođa sáhttá čuovvut ja gažaldagaid sáddet maiddái gáiddusin dilálašvuođa njuolggosáddagis Ohcejoga gieldda Youtube-kanálas.

Dárkilut dieđut Davvi-bieggafápmopárkka lávvaplánas gávdnojit čujuhusas www.ymparisto.fi/tuulivoimapuistoDavviYVA.

Lassedieđut:

Allagohcci Laura Aitala-Martesuo
Suoma birasguovddáš
0295 251 325
ovdanamma.sohkanamma@syke.fi