Sámegiella gáiddusoktavuođaid bokte juo ovccát lohkanjagi áigge - bissovaš ruhtadeapmái eavttut
19.8.2026
Sámegielaid gáiddusoahpahusa pilohttaprošeakta ovccát lohkanjagi oahpahus álggii vuossárgga 17.8. Lohkanjagi 2026–2027 áigge prošeavtta oahpahusas gazzet oahpu measta 200 oahppi ja stuđeantta 120 sierra skuvllas ja 45 gielddas miehtá Suoma. Prošeavttas barget lohkanjagi áigge golbma váldodoaibmasaš ja vihtta siidodoaibmasaš diibmooahpaheaddji.
Govva: Johanna Alatorvinen / Saamelaiskäräjät
Anárašgiela ođđa lohkanjagi áigge oahpahit Tuuli Paadar, Tiina Jäppinen ja Laura Ylinampa, nuortalašgiela Sonja Moshnikoff ja Kia Olin ja davvisámegiela Solja Magga, Joni Saijets ja Santeri Jounila. Ohcejoga gielddas bargi prošeaktahoavdan joatká Laura Njunnas ja ođđa prošeaktakoordináhtorin Sámedikkis álggahii prošeavttas ovdalge bargan Anni-Sofia Niittyvuopio.
Sámedikki oahpahusstatistihka mielde prošeavtta oahpahusa olis lea 24 % buot oahppiin, geat stuđerejit Suomas sámegiela, ja 65 % sámiid ruovttuguovllu olggobealat oahppiin. Oahppiid mearri lea šaddan njealje geardde stuorábun prošeavtta álggu rájes. Oahpahus lea ordnejuvvon jagi 2018 rájes prošeaktan, muhto oahppiid meari lassáneami ja doaimma stáđásmuvvama geažil fásta ruhtadeami mieđiheapmái leat eavttut ja vealtameahttun dárbu.
– Lea hui dehálaš, ahte sámiid ja nuoraid vuođđovuoigatvuođat ollašuhttojuvvojit dan láhkai, ahte fállojuvvo sámegielaid oahpahus olles riikkas. Dása eaktun lea bissovaš ruhtadeami várren gáiddusoktavuođaid bokte doaibmi oahpahussii, muitala Sámedikki ságajođiheaddji Pirita Näkkäläjärvi.
Prošeavtta bargit ja Ohcejoga gieldda ja Sámedikki ovddasteaddjit ráđđádalle miessemánus oahpahus- ja kulturministeriija virgegottiin bissovaš ruhtadeami mieđiheamis. Ovddit háve prošeavtta oahpahusa fástan rievdadeami birra ráđđádallojuvvui skábmamánus 2025 oahpahusminister Adlercreutzain.
– Prošeavttas joatkit aktiivvalaš ságastallama ministeriijain ja maiddái mearrideaddjiiguin ruhtadeami fástan rievdadeami várás. Seammás mii bargat min beaivválaš bargguid oahpahusa pedagogalaš ja teknihkalaš čovdosiid ovddideami ja alladásat oahpahusa fállama várás, gávnnaha prošeaktahoavda Laura Njunnas.
Oahppiid mearri vurdojuvvo lassánit juobe 300 oahppái fástan rievdadeami geažil
– Mii árvvoštallat, ahte gáiddusoktavuođaid bokte doaibmi oahpahusa sajádaga ovddideami ja bissovaš ruhtadeami geažil oahppiid mearri sáhttá lassánit 300 oahppái. Sin juohkehačča oažžun sámegiela oahpahusa ollái lea eallineaktu sámegielaid boahtteáiggi ja maid sin vuoigatvuođaid ollašuvvama dáfus, joatká Sámedikki skuvlenáššiid erenoamášáššedovdi Bigga-Helena Magga.
Sámegielaid gáiddusoktavuođaid bokte doaibmi riikkaviidosaš oahpahusdoaimma stáđásmahttin lea ovdan maiddái Sámiid duohtavuohta- ja soabadankomišuvnna raporta parlamentáralaš bargojoavkku barggus. Sámiid duohtavuohta- ja soabadankomišuvdna evttohii, ahte sámegielaid gáiddusoahpahus sámiid ruovttuguovllu olggobealde galgá rievdaduvvot fástan.
Lassidieđut
Laura Njunnas
Prošeaktahoavda, Ohcejoga gielda
laura.njunnas@edu.utsjoki.fi
040 701 2094
Anni-Sofia Niittyvuopio
Prošeaktakoordináhtor, Sámediggi
anni-sofia.niittyvuopio@samediggi.fi
040 687 5989