Ohcejoga gielda álggaha ovttasdoaibmanmeannudeami

Ohcejoga gielddaráđđehus čoahkkanii 15.4.2025 gieđahallat dušše ovtta ášši dahjege mearridit ovttasdoaibmanmeannudeami álggaheamis. Gielddaráđđehus mearridii, ahte unnimustá guđa vahku guhkkosaš nuppástusráđđádallamat álggahuvvojit.

Gieldda ruhtadoalu ferte heivehit unnimustá 600 000 euroin, man birra gielddaráđđehus mearridii 6.3.2025. Dan mearrádusa maŋŋá gieldda ruhtadoallorehkenastimat čájehit, ahte dilli lea vel fuonit go mii ovddalgihtii árvaluvvui, daningo heivehandárbu lea sullii 800 000 euro. Ulbmilin lea, ahte heivehandoaimmat ollašuhttojit golmma jagi áigge, man áiggis lea ulbmilin juksat bissovaš ruhtadoallováikkuhusaid.

– Mii fertet guorahallat buot molssaeavttuid maid sáhttá atnit ja maiguin goluid sáhttá geahpedit, manuid čuohppat ja boađuid lasihit, muitala gielddahoavda Päivi Kontio gieldda ruhtadili birra. – Gieldda doaimmaid lea vealtameahttun dárkkodit ekonomalaš ja doaimmalaš geahččanguovlluin.

– Dilli eaktuda doaimmaid, mat váikkuhit bargiidlohkui ja maiddái organisašuvnna ráhkadussii ja bálvalusaid buvttadeapmái. Buot dáid doaimmaid ja sierra molssaeavttuid galgá gieđahallat nuppástusráđđádallamiin bargiiguin.

Gielda álggaha nuppástusráđđádallamiid, mat gusket olles bargoveaga. Gielddas ledje jagi 2024 loahpas 91 bargi. Jos váldostivrra ásahan 600 000 euro seastin ollašuhttošii dušše nu ahte bargiidlohku geahpeduvvošii, livččii geahpedandárbu sullii 15 persovdnabargojagi. Ovdasajis gieđahallat mearreáigásaš bálvalangaskavuođaid ja ealáhahkii báhcima, dalle rabas doaimmaid dárbu árvvoštallo kritihkalaččat. Bargoveahkagoluid geahpedeapmi sáhttá dárkkuhit maiddái luopmudahttimiid, oasseáigásaš bargoáigái sirdáseami, eret cealkimiid, doaimma ođđasit organiserema ja maid bálvalusaid sirdima olggobeallái.

– Mii álggahit ovttasdoaibmanlága mielde nuppástusráđđádallamiid buvttadan- ja ekonomalaš sivaid geažil nu jođánitgo vejolaš, dadjá gielddahoavda Kontio.
– Mis lea unna bargosearvvuš, de álkes čovdosat eai leat, muhto mii fertet bargagoahtit seastindoaimmaid, vai gielddaekonomiija buorrána. Nuppástusráđđádallamat bistet unnimustá guhtta vahku gitta geassemánu beallemuttu rádjai ja ráđđádallamat ollašuhttojit ovttasbargojoavkku čoahkkáibijuin.

– Sávan bargoráfi buohkaide gieldda bargiide ja nuppástusráđđádallamiidda oassálasti olbmuide.

Gielddaráđđehusa čoahkkima beavdegirji (pdf)

Lassidieđut

Gielddaráđđehusa ságadoalli
Väinö Guttorm
040 503 1574
vaino.guttorm@utsjoki.fi

Gielddahoavda
Päivi Kontio
040 744 7630
paivi.kontio@utsjoki.fi