Olles Lappi eanagoddái leavvanmuttu ráddjehusat restoráŋŋaide
17.12.2021
Lappi eanagottis bohtet fápmui ráddjehusat restoráŋŋaide.
Stáhtaráđđi lea rievdadan ásahusa mainna restoráŋŋaid doaibma ráddjejuvvo koronaepidemiija dihtii. Koronaepidemiija leavvama eastadeapmái vealttakeahtes restoráŋŋaid ráddjehusat váldojuvvojit adnui olles Lappi eanagottis lávvardaga 18.12.2021 dii 00.00.
Alkoholavuovdin buot restoráŋŋain nohká dii 17 ja restoráŋŋa oažžu leat áššehasaide rabas dii 05-18. Ovdal alkoholavuovdima nohkama vuvdojuvvon alkoholajuhkamušaid oažžu juhkat ovtta diimmu alkoholavuovdima nohkama maŋŋá. Alkoholajuhkamušaid oažžu vuovdit dii 17 maŋŋá dušše koronapássa geavahettiin.
Jus restoráŋŋas ii leat alkoholavuovdin, dan oažžu doallat rabas diibmu 05-01. Ovdamearkan jođánisbiebmobáikkit ja káfeijat ožžot leat rabas numo dálge. Maiddái bárat ja ja boradanbáikkit ožžot leat rabas dii 05-01, jus doppe eai vuovdde alkoholajuhkamušaid.
Restoráŋŋain, main alkoholavuovdin lea oaivedoaibma, siste ja olgun lea geavahusas dušše bealli áššehasbáikkiin. Eará restoráŋŋain lea geavahusas dušše 75 proseantta áššehasbáikkiin.
Restoráŋŋa buot áššehasain galgá leat siste iežas čohkkánbáiki beavdeguoras dahje eará dan sullasaš dási guoras.
Molssaeaktun ovddabealde máinnašuvvon ráddjehusaide doaibmi sáhttá gáibidit áššehasain koronapássa geavaheami.
Spiehkastagat ráddjehusaide seilot nu mo ovdal
Ásahusa ráddjehusat eai guoskka bargiidrestoráŋŋaide eaige borramuša olggosvuovdimii áššehasaide. Rabasáiggiide guoski ráddjehusat eai guoskka Suoma ja olgoriikkaid gaskkas dahje olgoriikkas johtti čahce- dahje girdijohtolagaide eaige boaldámušávdnasiid vuovdinbáikkiid oktavuođas doaibmi restoráŋŋaide.
Dieđáhusa ođđa ráddjehusain sáhttá lohkat ollislaččat stáhtaráđi neahttasiidduin (suomagillii).