uDigi – Ohcejoga digitála eallinfápmu

Ohcejoga digitála eallinfápmu – uDigi -projeavtta ulbmilin lea doaibmifierpmádat, mii buvttada fitnodagaide bálvalusaid digitálalaččat ovtta ruvtto čoavddusin.

Korona sihke luossabivdogielddus leat buktán ovdan dárbbu ovddidit fitnodatbálvalusaid viidásut eallinfápmobálvalusollisvuođa guvlui. Gielddaid geahppáneaddji várit, nanusvuođa gáibádusat ja fitnodatrávvejeaddjiid viidu čehppodatdárbu gáibidit ođđalágan doaibmamálle hutkama, mii buktá maiddái smávva gielddaid fitnodagaid seamma sárgá ala fitnodat- ja eallinfápmobálvalusaid oasil. Dát oaivvilda fitnodagaide iežas fitnodatdoaimma ovddideami lassin vejolašvuođaid fierpmáiduvvat guovllu eará fitnodagaiguin, oktasaš vuovdaleami, áššehasháhkama, čehppodaga ovddideami jna. sihke maiddái fierpmáiduvvama eará guovlluid doaibmiiguin. Dat buktá nanusvuođa ja vejolašvuođaid maiddái oassálastit projeaktadoibmii, mii gáibida máŋggaid doaibmiid ja guovlluid, vai dat menestuvašii.

Geavadis dat oaivvilda Ohcejoga eallinfápmobálvalusaid gieldadási málle ovddideami ja das digitála bálvalusaid ovddideami ovttas guovlluguovdasaš doaibmiiguin. Dainna sihkkarasto bálvalusaid álkes fitnašuvvan, ovttaveardásašvuohta ja gollobeaktilvuohta. Ovddideami ulbmilin lea gávdnat vugiid, mainna sáhttá buoridit fitnodagaid gánnáhahttivuođa, álkidahttit ođđa fitnodagaid ja doaibmasurggiid šaddama guovllus sihke váikkuhit Ohcejoga geasuhan- ja bisuhanfápmui fitnodagaid perspektiivvas.

Projeavtta doaibmabijut

• Eallinfápmobálvalusaid dárbbuid áican
• Ohcejoga eallinfápmobálvalusaid málle, mii dahkko ovttas fitnodatdoalliiguin ja eallinfápmobálvalusaid buvttadeaddji doaibmiiguin.
• Eallinfápmobálvalusaid digibeassi, mii čohkke fitnodat- ja eallinfápmobálvalusaid buvttadeaddjiid ovtta luŋkká duohkái, buvttademiin fitnodatdoallái logalaš ja njuovžilis bálvalusbálgá.
• Iešguđetlágan doaimmaid sisdoallopiloteren (ee. fitnodatrávven, háhkamat, ruoná sirdáseapmi ja dieđiheapmi)
• Eallinfápmobálvalusaid eanagottálaš málle ovddiduvvo smávva gielddaid perspektiivvas.

Projeavtta ruhtadeapmi ja ollašuhttináigi

Projeavtta bušeahtta lea 199 074 euro, man lea juolludan Lappi lihttu, EAKR. Projeavtta ollašuhtti lea Ohcejoga gielda. Projektii lea válljejuvvon oasseáigásaš projeaktahoavdan Johanna Mikkola. Projeakta lea álgán 1.3.2022 ja nohká 30.10.2023.