Diehtu Ohcejoga birra

Gieldadieđut

Ohcejohka lea ássiidlogu dáfus unni, muhto vejolašvuođaid dáfusges stuoris. Mii leat rámis min sullii 1200 ássi servošis ja gávcci jagiáiggis. Ohcejohka gudnejahttá árbevieruid ja seammás geahččá duostilit boahtteáigái.

Min ođđa gieldastrategiija guovddáš áššin lea hállu sihkkarastit buohkaide Ohcejoga ássiide buorre eallinbirrasa ja vejolašvuođa fitnodatdoallamii ja barggu bargamii. Mis lea nana jáhkku ovttasráđiid doaibmamii, mii atnit árvvus min áidnalunddot luonddu ja mii leat čatnasan doarjut sámegiela ja -kultuvrra ealaskasvuođa. Ohcejohka lea gielda, masa gullet máŋggat árvvut, mii fállá vejolašvuođaid ja guoddá ovddasvástádusa – ja dat lea maid nannosit davimus, nugo min slogange muitala!

Ohcejoga gielda lea Badje-Lappis. Ássit leat čoahkkanan eanaš Suoma ja Norgga gaskasaš rádjejoga, Deanu (Deatnu ~ stuorra johka) gáddái. Min gielddas leat golbma stuorit giliguovddáža:

• Njuorggán
• Ohcejoga girkosiida
• Gáregasnjárga/Vuovdaguoika

Min ránnjágielddat leat Anár ja Norgga bealde Kárášjohka, Deatnu ja Unjárga.

Mis Ohcejogas historjá, kultuvra ja luondu gávnnadit áidnalunddot vugiin. Ohcejoga ja dan oalgejogaid gáttiin leat ássan juo duháhiid jagiid, ja Ohcejoga gieldda guovlluin leat gávdnan máŋggaid geađgeáiggi ássansajiid. Sámit ledje guhká guovllu áidna ássit.

Dál min gieldda ássiin sullii bealli hállet davvisámegiela eatnigiellan, ja sámegiella ja -kultuvra gullet min árgii. Sámi duodji, musihkka ja árbevirolaš ealáhusat, nu mo boazodoallu, leat dehálaš Ohcejoga identitehta oassi. Dat maid muitalit muitalusa mo eallit ja gulahallat luondduin. Gieldda buot golmma giliguovddážis buvttaduvvojit bálvalusat sihke suoma- ja sámegillii.

Ohcejohka lea dovddus maiddái riikkaidgaskasaš ealáhusdoaimmas ja kultur- ja luondduturismabálvalusain. Dál Ohcejoga guovllu bargosajiin juohke logát lea álgobuvttadeami bargosadji, go fas golbma bargosaji njealjis leat priváhta dahje almmolaš bálvalusa bargosajit. Buot golmma giliguovddážii leat maŋimus jagiid huksen ođđa skuvla-máŋggadoaimmaguovddážiid. Dat fállet gieldda ássiide dorvvolaš ja dearvvašlaš lanjaid bargamii, árrabajásgeassimii, studeremii ja áiggeájiide.

Árktalaš ebmos luondu lea min gieldda stuorámus geasuheaddji, ja mii háliidit atnit das ávvira. Ohcejoga luondu lea máŋggabealat ja gávcci jagiáiggi mielde dat nuppástuvvá duojážassii. Dáppe sáhtát vánddardit duoddariin, johtit čázádagain, vuoigŋat buhtes áimmu, čáppášit guovssahasaid, návddašit luonddu herskkuin, dárkkodit ealliid ja guldalit jaskatvuođa. Geassit ijahis idja bistá olles 74 jándora, ja dálvit mii návddašit skápmasges olles 52 jándora.

Unna servošis lea sitkatvuohta, fápmu ja hállu hukset boahtteáiggi ja liikká seailluhit čanastaga árbevieruide. Min gielddas lea alla dási almmolaš dearvvašvuođafuolahus, buorit vuođđobálvalusat, hui ollu iešguđegelágan áiggeájit ja virkos fitnodatdoaibma. Ohcejohgieldda ráji nuppe bealde lea Norga. Maiddái Norgga beale gielddaid bálvalusat, muosáhusat, oaidnámušat ja Jiekŋamearra leat áibbas lahka.

Suoma alimus čohkas lea vejolašvuohta sihke lotkes ja aktiivvalaš eallimii. Ohcejogas lea sadji ráfot ja jaskkodit – ja maiddái bargat ja fidnet inspirašuvnna! Leaččat dal finadeamen dahje báhcimin, de mii sávvat dutnje váimmolaš buresboahtima Ohcejohkii!

Ohcejoga logut

Vuođđudanjahki: 1876
Vearroproseanta 2023: 8,36
Ássiidlohku 31.12.2022: 1180
Viidodat: 5370 km²

gaskkat

Helssegii 1267 km
Avvilii 164 km
Roavvenjárgii 453 km
Soađegillái 325 km
Turkui 1280 km
Tamperei 1136 km