OHCEJOGA NUORAIDRÁĐĐI nappo NuVa

ULBMIL

Ohcejoga gieldda nuoraidráđđi lea Ohcejoga nuoraid ovddastusorgána, mii ovdanbuktá nuoraid áššiid ja nuoraid iežaset oaiviliid.  Nuoraidráđđi ovddida oktasašbarggu ee. eará gieldda ja nuoraid doaibmaorgánaid gaskka áššiin, mat guoskkahit nuoraid.

LAHTUT JA DOAIBMAORGÁNAT

Nuoraidráđđái gullet eanemustá gávcci (8) lahtu, Ohcejohnjálmmi ja Gáregasnjárgga badjeskuvllain ja Ohcejoga sámelogahagas galgá leat válljejuvvon unnimustá okta lahttu. Nuoraidráđđái lea vejolaš válljet maiddái skuvllaid olggobealde vuollel 29-jahkásaš nuoraid geat ásset Ohcejogas.

Jus nuoraidráđđái válljejuvvon lahttu fárre eará báikegoddái, son ii sáhte šat doaibmat nuoraidráđi lahttun. Jus nuoraidráđđái válljejuvvon ovddasteaddji molsu skuvlla gaskan doaibmabaji, son ii sáhte šat doaibmat álgoálgosaš skuvlla ovddasteaddjin, baicce gažaldat vuloš skuvlla bokte válljejuvvo su sadjái ođđa ovddasteaddji loahppa doaibmabadjái.

Nuoraidráđđi vállje iežas lahtuin doaibmabadjái ságadoalli, várreságadoalli ja čálli. Asttuáiggečálli bagada nuoraidráđi.

DOAIBMABADJI

Nuoraidráđi doaibmabadji lea okta jahki. Nuoraidráđđái ohcet ođđa lahtuid jahkásaččat lohkanjagi álggus. Jus nuoraidráđđái hálidit badjel 8 nuora, lahtuid válljet  válggain. Válggat ordnejuvvojit lohkanjagi álggus. Jus nuoraidráđđái bohtet guoros sajit gaskan doaibmabaji, sajit devdojuvvojit nu, ahte juohke skuvllas lea unnimustá okta ovddasteaddji.

ČOAHKKIMAT

Nuoraidráđđi čoahkkana sullii oktii mánotbajis skuvllaid lohkanjagi áigge. Geasseluomuid áigge eai leat čoahkkimat.

Čoahkkinbovdehus doaimmahuvvo čieža (7) beaivvi ovdal čoahkkima e-poastta bokte ja nuoraidráđi sosiálamedia jovkui. Nuoraidráđi ságadoalli ja asttuáiggečálli bargaba čoahkkinbovdehusa. Čoahkkinbovdehus doaimmahuvvo diehtun skuvllaid rektoriidda ja čuvgehushoavda-rektorii.

Čoahkkimiin dollo beavdegirjji.

Čoahkkimiin mákso 25 euro čoahkkinbálkká, čoahkkima ságadoallái mákso 37,50 euro čoahkkinbálká. Nuoraidráđi čoahkkimiidda ja eará nuoraidráđi doaimmaide gullevaš mátkkiin buhttejuvvojit nuoraidráđi lahtuide mátkegolut gieldda mátkkoštannjuolggadusa mielde.

NUORAIDRÁĐI DOAIBMA

Nuoraidráđis lea iežas mearreruhta, man geavaheamis dat mearrida. Nuoraidráđđi čállá jahkásaččat doaibmarávvaga.

Nuoraidráđđi dahká evttohusaid ja álgagiid áššiide, mat gusket nuoraide.

Nuoraidráđđi vállje iežas ovddasteaddjiid čuvgehuslávdegoddái ja vejolaš eará doaibmaorgánaide maidda sáhttá nammadit ovddasteaddji.

Nuoraidráđđi ordne jahkásaččat iežas dáhpáhusaid mearreruđaid olis.

Nuoraidráđđi dieđiha iežas doaimmas nu beaktilit go lea vejolaš.