“Buoremus tuvra, mii skuvllas leamašan”

Báikkálaš turismafitnodagat dolvo mánáid duoddarii oahpásmuvvat boazodollui

Govva: Minna Karjalainen

Ohcejohnjálmmi skuvlamánát besse dán giđa oahpásmuvvat boazodollui, go báikkálaš turismafitnodat Travel Utsjoki ordnii skuvlamánáide tuvrraid ealu lusa Báišduoddara guovllus.

Tuvrraid hutkkaiga Travel Utsjoki fitnodatdoalli Petra Suontausta ja su badjeolmmošguoibmi Ari-Heikki Aikio. Soai leaba lihkostuvvan ovttastahttit boazodoalu ja turismma iežaska fitnodatdoaimmas.

– Jurdda ovttasbarggus oahppolágádusain šattai munno fitnodaga vásttolašvuođasertifikáhta vuođul, go Bioshpere Sustainable -sertifikáhta, man munno fitnodat lea ožžon, eaktuda vásttolaš doaimmaid, muitala Petra Suontausta.  – Ovttasbargu skuvllaiguin orui leamen munnuide vuogas vuohki bidjat návccaid báikkálaš servošii ja válddiime oktavuođa Ohcejohnjálmmi skuvlii jo čakčat.  Skuvllas movttáskedje ja tuvrraid ealu lusa bidje giđa lohkanortnegiidda. Finaheimme njeallje sierra joavkku duoddaris oahpásmuvvamin boazodollui.

– Tuvrraid lei álki ordnet, go munno prográmmabálvalusfitnodagas ledje jo gárvvisin biergasat ja gálvvut ja gielkkát ja reagat dorvvolaš johtima várás. Joavkkuin ledje mánát ovdaskuvlalaččain gitta čihččet luohkkái. Tuvrrat lihkostuvve bures go mis lei eallu lagaš duoddaris ja deive vel buorre siivvutge. Muitaleimme boazodoalu birra ja mánát besse biebmat bohccuid. Muitaleimme maiddái mo dálkkádatrievdan váikkuha boazodollui ja boazobargguide, ja ná lea kánske mánáidege álkit áddet mo dát máŋggadáfot fenomena váikkuha iežas ruoktoguvlui.

Govva: Minna Karjalainen

Nisttiid borran dollagáttis sihkkarasttii tuvrra lihkostuvvama. – Lihkostuvaime hástit moadde earáge fitnodaga mielde ordnedemiide. Uulan Säästös ja Hotel Utsjokis oaččuimet nisttiid ja Lomatärppi gielkáofelaš ja Hotel Utsjoki hoteallajođiheaddji leigga veahkkin vuodjimin gielkkáid.

– Vuoikko máŋgga skuvlalažžii boazodoallu leage oahpis iežas bearraša bargguid bokte, de máŋgga mánnái lei ođđa ášši beassat oahpásmuvvat bohccuide ja daid dikšumii, dadjaba Petra ja Ari-Heikki. – Buohkat besse dál leat mielde.

Gieldda buresveadjinhoavda Pirjo Seurujärvi illuda fitnodatdoalliid ordnen tuvrrain ealu lusa. – Válddiimet Petra ja Ari-Heikki fálaldaga iluin vuostá ja gielda giitáge váimmolaččat buot fitnodagaid, mat ledje mielde! Dákkár doaibma doarju njuolga gieldastrategiija ollašuhttima, go min strategiijas daddjo ahte gielddas bargat nuoraid máhtu ovddideami ovdii gieldda guovddáš doaibmasurggiin, nugo turismmas ja boazodoalus.