Dearvvasvuođa- ja buresveadjinlágádusa (THL) ođđa ávžžuhusaid váikkuhus Ohcejoga gieldda koronaboahkohusaide (4.2.2021)

Ohcejoga gielddas koronaboahkohusa leat dán rádjai ožžon 220 olbmo.

Ohcejoga gieldda boahkohusat leat álggahuvvon vahkus 2 (sosiála- ja dearvvasvuođasuorggi bargit), vahkus 3 (seaŋgaossodaga ja dikšunossodagaid ássit) ja vahkus 4 (badjel 70-jahkásaččat ja riskajoavkkuide gullevaš gieldda ássit). Boahkohusaid álgin ja boahkohanortnet Ohcejogas lea vuođđuduvvon álo dan THL:a rávvagii, mii goasge leamašan fámus, Lappi buohcedikšunbiirre infekšuvdnaossodaga árvvoštallamii dilis, ja buohcceviessoapotehka árvvoštallamii boahkuid oažžumis.

Álgovuolggalaš árvvoštallama mielde gielddas galge buot riskajoavkkuide gullevaččat ja sin lagas olbmot leat boahkohuvvon vahkus 5. THL:a ávžžuhusat leat rievdan máŋgii boahkohemiid áigge, nugo maid dieđut boahkuid oažžumis. Dan dihte maiddái Ohcejoga gieldda boahkohanprográmma lea rievdan. Oassi olbmuin gearggai oažžut boahkohusa álgovuolggalaš plána mielde (eandalii Njuorggámis ja Gáregasnjárggas), muhto boahkohusaid fertii gaskkalduhttit. Boahkohusat eai leamašan oažžumis plána mielde, iige leamašan vejolaš juksat dan ulbmila, mii álggus lei.

THL boahkohusáššedovdijoavku ávžžuha guhkidit koronaboahkohusaid gaskka ja addit AstraZeneca-boahkohusa dušše vuollel 70-jahkásaččaide.

Ohcejoga gielddas boahkohusat leat álggahuvvon Pfizer/Biontech ja Moderna boahkuiguin. THL:a ođđa rávvaga mielde dát boahkohusat addojit dál dušše 70-jáhkasaččaide ja boarrásabbuide, ja beavttálmahttinboahkohus addo daidda, geat leat jo ožžon prográmmii gullevaš vuosttas boahkohusa. Beavttálmahttinboahkohusa gaska lea guhkiduvvon 12 vahkkui. Nuppástusat bohtet fápmui vahkus 6. Vahkus 5 beavttálmahttinboahkohusat addojuvvojit ain boares rávvaga mielde, muhto das ovddos buot beavttálmahttinboahkohusat sirdojuvvojit 12 vahku geahčái vuosttas boahkohusas.

Ođđa rávvagat ja váttisvuođat fidnet boahkuid leat rievdadan boahkohusáigeplána olles riikkas. Ohcejoga gielda váldá dán muttus oktavuođa vuosttamužžan daid badjel 80-jahkasaččaide, geat eai velá leat boahkohuvvon. Mii váldit maiddái oktavuođa daidda, geaid beavttálmahttinboahkohusaid áigi sirdojuvvo, ja šiehttat ođđa áiggi.

Mii giitit olbmuid gierdavašvuođa ovddas ja almmuhit ođđa boahkusáiggiid dalán, go oažžut dieđu das, ahte boahkut leat oažžumis.