Gielddaráđđehus: Báikkálaččaid vuoigatvuođaid galgá seailluhit Geavu luonddumeahcis ja bargojoavku čielggadišgoahtá boares skuvlavisttiid anu
6.9.2022
Ohcejoga gielddaráđđehus čoahkkanii vuossárgga 5.9. čavčča vuosttas čoahkkimii gieđahallat earret eará ruhtadoallo- ja lávvaáššiid, Geavu luonddumeahci ráfáidahttinnjuolggadusaid ja gieldda boares skuvlavisttiid anu.
báikkálaččaid vuoigatvuođaid galgá seailluhit geavu luonddumeahcis
Gielddaráđđehus dagai čoahkkimisttis cealkámuša Geavu luonddumeahci ráfáidahttinnjuolggadusain. Birasministeriija lea bivdán Ohcejoga gielddas cealkámuša ráđđehusa evttohushápmosis, mii gieđahallá jagi 1923 luonddusuodjalanlágain vuođđuduvvon luonddumehciid, álbmotmehciid ja eará luonddusuodjalanguovlluid guoski lágaid nuppástuhttima. Suodjalanguovlluid ráfáidahttinnjuolggadusaid leat beaivádeamen vástidit ođđa luonddusuodjalanlága.
Ohcejoga gielda atná cealkámušastis dehálažžan, ahte ráfáidahttinnjuolggadusain sihkkarastet sámekultuvrra bajásdoallama ja ovddideami eavttuid sápmelaččaid ruovttuguovllus dego vuođđoláhka gáibida. Gielda ii goittotge doarjjo láhkahápmosa evttohusa das, ahte báikkálaš sápmelašservoša lahtut sáhtášedje hukset luondduealáhusaid dáfus dárbbašlaš lavdnjegođiid Geavu luonddumeahcis Meahciráđđehusa lobi haga. Ohcejoga gielda evttoha cealkámušastis, ahte lavdnjegođiid huksemii gáibiduvvo Meahciráđđehusa lohpi.
Dálá luonddusuodjalanláhka addá báikkálaš olbmuide vuoigatvuođa čoaggit murjiid ja guobbariid ja gárdut rievssahiid maiddái Geavu luonddumeahcis. Ohcejoga gielda atná dehálažžan, ahte dát vuoigatvuođat seailluhuvvojit ođđa lágas. Maiddái boazodoalu dohkkeheapmi Geavu luonddumeahcis lea gieldda mielas dehálaš girjen láhkaevttohusas.
Ohcejoga gieldda olles cealkámuša Birasministeriijai sáhttá lohkat dákko (suomagillii).
bargojoavku čielggadišgoahtá boares skuvlavisttiid anu
Gielddaráđđehus mearridii vuođđudit bargojoavkku čielggadit boares skuvlagiddodagaid geavaheami.
Ohcejoga gielddas leat ođđa skuvla-doaibmadáluid mielde buot giliguovddážiin báhcán guorusin mearkkašahtti mearri boares skuvlavisttit, maid geavahanulbmilis ii leat ovdal mearriduvvon. Guoros skuvlavisttiid geažil gildii šaddet liggen- ja giddodatfuolahusgolut, mat jagiid mielde sáhttet šaddat mearkkašahtti ekonomalaš noađđin. Lassin giddodagat leat giliguovddážiid árvvusadnojuvvon tonttiin.
Bargojoavkku bargun lea čielggadit ovddeš skuvlavisttiid bajásdoallogoluid, huksenteknihkalaš geavahanvejolašvuođa ja guorahallat doaibmalanjaid vejolaš ođđa geavahanvugiid. Gielddaráđđehus nammadii bargojoavkku lahttun Mika Aikio, Vesa Länsman, Ismo Manninen, Sammol Lukkari, Marjatta Kordelin ja Eeva Jaatinen. Lassin bargojovkui gullet gieldda giddodathoavda Markku Porsanger, eallinfápmohoavda Tanja Lepistö ja čuvgehushoavda Virpi Veskoniemi. Bargojoavkku čállin doaibmá giddodatinšenevra Mirja Savolainen.
Bargojoavkku doaibmabadji lea guovvamánu 2023 lohppii.
čoahkkinbeavdegirji neahtas
Gielddaráđđehusa čoahkkima olles beavdegirjji sáhttá lohkat suomagillii dákko. Sámegiel beavdegirji almmustahtto jorgalusa gárváneami maŋŋá.