Gielddaráđđehus dohkkehii boahtte jagi bušeahttaárvalusa ja hálddahusnjuolggadusa nuppástusaid – váldostivra mearrida loahpalaččat juovlamánus
29.11.2022
Ohcejoga gielddaráđđehus mearridii vuossárgga 28.11. čoahkkimisttis dohkkehit gieldda jagi 2023 bušeahttaárvalusa ja jagiid 2024–2025 ekonomiijaplánaid ja evttohit daid dohkkeheami váldostivrii. Dán oktavuođas gielddaráđđehus evttoha váldostivrii, ahte dat addá gielddaráđđehussii 250 000 euro loatnaváldinfápmudusa. Loana váldimii ferte ráhkkanit vuoi gielddas lea máksingearggusvuohta Ohcejoga gieldda ekonomalaš dili ja investerenplánii čállojuvvon investeremiid dihte. Sihke Ohcejoga gieldda bušeahttaárvalussii 2023 ja ekonomiijaplánaide 2024–2025 sáhttá oahpásmuvvat dákko (suomagillii, sámegiel jorgalus almmustuvvá maŋŋá).
Dasa lassin gielddaráđđehus dohkkehii gieldda hálddahusnjuolggadusa nuppástusaid ja evttoha daid dohkkeheami váldostivrii. Hálddahusnjuolggadussii evttohuvvon guovddáš nuppástusat leat vuođđodorvolávdegotti ja čuvgehusdoaimma sáme- ja suomagiel juhkosiid heaittiheapmi ja teknihkalaš- ja eallinfápmolávdegottiid ovttastahttin. Teknihkalaš ja eallinfámu doaibmasurggiid oktasaš strategalaš mihttomeriide ja njuovžilis oktasašbargui lea dárbu earret eará Ohcejoga fáhkka ráhkadusnuppástusa, sode-ođastusa, eanapolitihka ja lávva-, viesso- ja giddodatáššiid dihte. Ođastus geahppudivččii maid hálddahusa ja beavttálmahtášii resurssaid geavaheami. Hálddahusnjuolggadussii árvaluvvon nuppástusaide sáhttá oahpásmuvvat dákko (suomagillii, sámegiel jorgalus almmustuvvá maŋŋá). Ulbmil lea, ahte ođđa hálddahusnjuolggadus boahtá fápmui 1.1.2023.
Ohcejoga gieldda váldostivra čoahkkana mearridit loahpalaččat earret eará dáid áššiin juovlamánu 15. beaivve.
Lassin gielddaráđđehus earret eará nammadii lahtuid iešguđetlágan bargojoavkkuide, gieđahalai gieldastrategiija beaivádanbargui ráhkkaneami ja mearridii boahtte jagi riikkabeaiválggaid ovdajienastanbáikkiin. Čoahkkima beavdegirjái sáhttá oahpásmuvvat dákko (suomagillii, sámegiel jorgalus almmustuvvá maŋŋá).