Gr 8.6.2026: Ohcejoga gielddaráđđehus váidá Lapha mearrádusa
10.6.2026
Ohcejoga gielddaráđđehus mearridii čoahkkimis 8.6. dahkat váidaga Lapha guovlohálddahusa mearrádussii gaskkalduhttit Ohcejoga ruoktobuohcceviesu doaimma borgemánu lohppii. Lapha lea ákkastallan šluhttema rekryterenváttisvuođain. Ohcejoga gieldda oaivil lea, ahte mearrádusa válmmaštallan ja váikkuhusaid árvvoštallan leamašan váilevaš. Váilevaš čielggadeami dihtii báhcá eahpečielggasin, leago ruoktobuohcceviesu doaimma gaskkalduhttin leamašan vealtameahttun ja rivttes doaibmabidju. Dan lassin fuola boktá dat, devdetgo mearrádusas ovdanbukton buhttejeaddji ordnemat daid gáibádusaid, mat buresveadjinguovllus leat sosiála- ja dearvvasvuođafuolahusa ordnengeatnegasvuođa, dearvvasvuođafuolahuslága ja bálvalusaid ovttaveardásaš fidnema ja olahahttivuođa guoski njuolggadusaid vuođul.
Gieldda boahtte jagi bušeahttarámma ráhkadeapmi lea gaskan, go doaibmasurggiid ovttadathattit dárkkálmahttojuvvojit ain. Doaibmasurggiid bušeahttarámma jahkái 2027 buktojuvvo dohkkehanláhkai gielddaráđđehusa borgemánu čoahkkimii.
Gielddaráđđehus gieđahalai guokte heađuštanalmmuhusa, maidda ášši vástideaddjit leaba dahkan iežaska vástagiid. Heađuštanalmmuhusaid dihtii gielddaráđđehus vuođđudii jo árabut giđđat čielggadanbargojoavkku. Joavkku bargogohččosa mearridedje joatkit nu, ahte bargojoavku doaimmaha gielddaráđđehussii loahpalaš čálalaš čielggadeami ja evttohusa ášši čoavdimin vel dárbbašlaš gullamiid ja cealkinvejolašvuođaid maŋŋá. Čielggadeami galgá doaimmahit gielddaráđđehussii maŋimustá 7.8.2026.
Vuojadanhálla basadan- ja gárvodanlanjaid sanerema čielggadeapmi lea gárvánan. Váldostivra dohkkehii njukčamánu čoahkkimis árvalusa, man mielde dat gáibidii ahte vuojadanhálla sanerenprošeavtta soahpamuša dilli, lassebargogáibádusat ja prošeavtta válmmaštallanproseassa čielggaduvvo čálalaččat ja čielggadeapmi buktojuvvo diehtun váldostivrii. Árvalusa mielde čielggadeapmi lea gárvánan ja dat dolvojuvvo váldostivrii diehtun váldostivrra čoahkkimis 17.6.2026. Ovdal váldostivrra čoahkkima dollojuvvo eahketskuvla, mas čielggadeapmi manno čađa.
Gielddaráđđehus dohkkehii tontegávppi vuovdindieđuid ja evttoha daid ain váldostivrii dohkkehanláhkai. Tonttiid haddebidjama dárkkálmahttimat máhcahuvvojedje válmmaštallamii.
Gielddaráđđehus dohkkehii ja evttoha ain váldostivrii dohkkehanláhkai 50 000 euro lassemearreruđa jahkái 2026 investerenprográmmii. Lassemearreruhta guoská Seitakartano ja rabasbálvalanguovddáža sisáibmodivodemiid.
Čoahkkima beavdegirji (pdf)
Lassedieđut
Gielddaráđđehusa ságadoalli
Vuokko Tieva-Niittyvuopio
0400 933 754
vuokko.tieva-niittyvuopio@utsjoki.fi
Gielddahoavda
Päivi Kontio
040 744 7630
paivi.kontio@utsjoki.fi