Johtolatlihkohisvuođahárjehus dollojuvvo maŋŋebárgga 12.5. Ohcejoga skuvlaguovddáža birrasis

Ohcejogas ordnejuvvo maŋŋebárgga 12.5.2026 duođalaš johtolatlihkohisvuođa gádjun-, evakueren- ja ohcanhárjehus Utsjoki26. Hárjehussii oassálastet gádjunlágádus, Lapha – dearvvasvuođaguovddáš, vuosttasveahkki ja sosiáladoaimmahat-, Lappi poleslágádus, VPK, Vapepa ja SPR. Maiddái oassi Ohcejoga gieldda bargiin ja logahat- ja badjedáseoahppiin servet hárjehussii.

Eahketbeaivvi áigge hárjehallet stuorra lihkohisvuođa, mas lea dáhpáhuvvan duođalaš máŋgga vuodjinfievrru johtolatlihkohisvuohta. Hárjehus dollojuvvo Ohcejohnjálmmi skuvlaguovddáža birrasis, ja dan dihtii skuvlla birrasis johtet olu polesbiillat, ambulánssat ja eará gádjunfievrrut.

– Gielda lea beaividan gearggusvuođaplána, giliid dorvvolašvuođaplánaiguin leat bargamin ja gielda lea searvan iešguđet lágan guvllolaš gearggusvuođahárjehusaide, muitala gielddahoavda Päivi Kontio.

– Dál hárjehallat geavatlaččat stuorra lihkohisvuođa. Dákkár hárjehus ii leat Ohcejoga gielddas leamašan guhkes áigái ja lea duođaid dehálaš, ahte mii nagodat dahkat oktasašhárjehusa vejolažžan gielddas. Hárjehus lea plánejuvvon ovttasráđiid iešguđet doaibmiiguin, vai beassat gazzat eahketbeaivve áigge nu buori oahpu go lea vejolaš.  Gieldda geahččanguovllus lea dehálaš čielggasmahttit iežamet doaibmanproseassaid, vaikko ieš hárjehus lea eanáš eiseválddiid ovttasbargu.

– Seammás iskat mo ovttasbargu eiseválddiid ja eaktodáhtolaš doaibmiid gaskkas doaibmá. Lihkohisvuođahárjehusa dáhpáhus sáhttá dáhpáhuvvat albma láhkai goas beare, ja dan dihtii leage buorre hárjehallat vai duohta dilis máhttit doaibmat njuovžilit ja johtilit, lohká Päivi Kontio.

Hárjehus dollojuvvo 12.5. dii 13-17, ja dalle Ohcejohnjálmmi skuvlla birrasis lea spiehkkaseaddji doaibma ja johtolat. Hárjehusa vásáhusaid ja oahpuid birra háleštat ovttas hárjehusa maŋŋá.

Lassedieđut

Gielddahoavda Päivi Kontio, 040 744 7630, paivi.kontio@utsjoki.fi