Lappi buresveadjinguovllu áššehasmávssut ja rehketčállin 1.1.2023 rájes
Lappi buresveadjinguovllu áššehasmávssut rivdet seammaláganin olles Lappi viidodagas 1.1.2023 rájes.
Lappi buresveadjinguovllu áššehasmávssut rivdet seammaláganin olles Lappi viidodagas 1.1.2023 rájes. Dat sáhttá dagahit nuppástusaid mávssuide, mat berrojit muhtin áššehasain. Ja rievdadusat sáhttet maiddái guoskat dasa, man láhkai áššehasmávssuin čállojit rehkegat.
Guovllustivra dohkkehii čoahkkimis 19.12.2022 áššehasmávssuid almmolaš vuođustusaid boahtte jagi bušeahta oktavuođas. Guovlluráđđehus lea jo árat dohkkehan áššehasmávssuid, mat leat eanaš áššehasmáksolága ja -ásahusaid eanemus meriid mieldásaččat.
Áššehasmáksu sáhttá leat seammalágan máksu, goas máksu lea seammasturrosaš buohkaide, eaige dasa váikkut áššehasa boađut. Oassi áššehasmávssuin mearrašuvvá áššehasa boađuid ja bearašgaskavuođaid mielde.
Dearvvasvuođabálvalusaid mávssut leat buohkaide seammasturrosaččat
Vuođđodearvvasvuođafuolahusas ja spesiálabuohccedikšumis leat geavahusas seammalágan áššehasmávssut. Dábáleamos dearvvasvuođafuolahusa fitnanmávssut leat:
- Dearvvasvuođadálus doaktáris fitnan máksá 20,90 €. Fitnamis čállojuvvo rehket eanemustá golbmii kaleandarjagi áigge.
- Bátnedoaktáris fitnanmáksu lea 13,30 € ja njálbmehygienistta luhtte fitnan 10,30 €.
- Spesiálabuohccedikšumis poliklinihkkamáksu lea 41,80 € ja beaivekirurgiija máksu 136,90 €.
Jagi 2023 máksogáhttu lea 692 €. Máksogáhtu badjel mannama maŋŋá eanaš oassi bálvalusain lea áššehassii nuvttá kaleandarjagi loahpa rádjai. Bálvalusaid geavaheaddji galgá ieš čuovvut máksogáhtu dievvama.
Almmá siva haga šluhttetkeahttá dahje geavatkeahttá guđđon vuostáiváldimis dahje oanehis áigge dikšun- ja ássanbálvalanbáikkis berrojuvvo 51,50 € sáhkkomáksu. Máksu ii berrojuvvo vuollái 18-jahkásaččain. Sáhkkomáksu ii berrojuvvo maiddái dalle, jos fitnan šluhttašuvvá bákkolaš siva dihtii, nugo fáhkkatlaš buohccáma geažil.
Vuollái 25-jahkásaččaid eastadanbálvalusat leat nuvttá. Maiddái veteránain, partisánafallehemiid oaffariin ja šibihiid evakueremii soahteguovlluin oassálastán olbmuin eai berrojuvvo doaktára vuostáiváldin-, poliklinihkka-, beaivebuohccedikšun- ja ráidodikšunmávssut.
Ruoktodikšuma ja bálvalanássama mávssut leat gitta áššehasa boađuin
Buresveadjinguovlu bearrá jotkkolaš ja fásta ruovttus addon bálvalusas ja maiddái guhkálaš ássanbálvalusas mánotbadjemávssu, mii mearrašuvvá bálvalanmearrádussii merkejuvvon bálvalandiimmuid meari, áššehasa máksinnávcca ja bearraša sturrodaga mielde. Máksu ii govčča ássangoluid.
Guhkálaš beavttálmahtton bálvalanássamis, bearašdikšumis ja lágádusdikšumis berrojuvvo mánotbadjemáksu, man sturrodat lea eanemustá 85 % áššehasa nettománotbadjeboađuin, main leat dahkkon lágas ásahuvvon geahpádusat. Jos áššehasa boađut leat oktasašdállodoalus stuorát go beallelačča boađut, máksu mearrašuvvá beallelaččaid oktiirehkenaston mánotbadjeboađuid vuođul. Dalle máksu sáhttá leat eanemustá 42,5 % oktiirehkenaston mánotbadjeboađuin, main leat dahkkon geahpádusat.
Guhkálaš lágádusdikšumis ja beavttálmahtton bálvalanássamis áššehassii galgá báhcit geavahanruhta. Ahkeolbmuid guhkálaš beavttálmahtton bálvalanássamis ja guhkálaš bearašdikšumis geavahanruhta lea 167 € ja guhkálaš lágádusdikšumis uhcimustá 112 € mánotbajis.
Dearvvasvuođabálvalusain, mat addojit ruovttus, ja ruovttubuohcceviesu dikšunfitnamis berrojuvvo 12,20 € ja doaktára dahje bátnedoaktára ruovttufitnamis 19,20 €.
Buresveadjinguovlu bearrá áššehasas govttolaš mávssu borramuš-, bivttasfuolahus-, bassan-, čorgen- ja dorvobálvalusain ja maiddái ássama doarju eará bálvalusain.
Álgojagi rehkegat sáhttet maŋŋonit – daga ođđa e-rehketdiŋgoma neahttabáŋkkustat
Lappi buresveadjinguovllu rehketčállinvuogádaga nuppástusaid dihtii álgojagi áššehasrehkegiin sáhttet leat ádjáneamit. Mihttomearrin lea, ahte ođđajagemánu fitnamiin berrojuvvojit mávssut maŋimustá guovvamánus. Lappi buresveadjinguovllu áššehasmáksoovttadat bearrá áššehasmávssuid ja rávve áššiin, mat laktásit áššehasmávssuide.
Lappi guovddášbuohcceviesu ja Länsi-Pohja guovddášbuohcceviesu áššehasrehketčállin joatkašuvvá dábálaččat boatkankeahttá álgojagi 2023.
Áššehasmáksoovttadat ávžžuha, ahte neahttabáŋkku geavaheaddji áššehasat váldet geavahussii e-rehkega. Lappi buresveadjinguovllu e-rehkega sáhtát diŋgot iežat neahttabáŋkkus.
Gielddaid dálá e-rehkegat ja njuolggomáksosoahpamušat eai automáhtalaččat sirdás Lappi buresveadjinguvlui. Jagi 2023 vuosttas rehkega oktavuođas oaččut rávvagiid e-rehkega diŋgoma várás ja njuolggomáksosoahpamuša bargama várás báŋkkuinat. Rávvagiid gávnnat maiddái min neahttasiidduin lapha.fi jahkemolsašumi maŋŋá.
Reaidamáksimiid vuostáiváldin ovttadagain, mat sirdásit Lappi buresveadjinguvlui, nohká 31.12.2022. 1.1.2023 rájes it sáhte šat máksit reaidaruđain, muhto aivvefal mákso- ja báŋkogoarttain dahje rehkegiin.
Lassidieđuid addá:
Jaana Koskela
Doaimmahatbálvalusaid hoavda
Lappi buresveadjinguovlu
040 358 3309