Ohcejoga gielda evttoha, ahte Lappi buresveadjinguovlu válmmaštallá sámegielat sode-bálvalusaide iežas ollašuhttinprográmma
12.1.2023
Ohcejoga gielda evttoha, ahte sámegielat sode-bálvalusaide válmmaštallo Lappi buresveadjinguovllus iežas ollašuhttinprográmma. Sierra ollašuhttinprográmma lea gieldda mielas vealtameahttun vai buresveadjinguovlu čatnasa sámiid bálvalusaid ollašuvvamii ja ovddideapmái. Maiddái sámediggi ja Lappi buresveadjinguovllu sámegiela stivrenjoavku leat evttohan ollašuhttinprográmma válmmaštallama.
Ohcejoga gielda lea otne 12.1. addán cealkámušas Lappi buresveadjinguovllu strategiijahápmosis. Ohcejoga gielda doarju buresveadjinguovllu olbmo dárbbuin vuolgi višuvnna (“Lappi guovllus mii eallit buori ja dorvvolaš eallima.
Mis olbmot ja bálvalusat deaivvadit rivttes báikkiin rivttes áigái.“) ja miššuvnna (“Dorvvolaš osolaš čađa eallima.“). Gielda doarju nannosit maiddái buresveadjinguovllu meroštallan árvvuid (“ovttaveardásaš, vásttolaš, luohtehahtti, olmmošlaš“) ja sávvá, ahte dat oidnojit buresveadjinguovllu doaimmas ja guddet guhkás 2030-lohkui.
Smávva ja hárvvet ássojuvvon ja guhkes gaskkaid gielda lea goittotge fuolas lagašbálvalusaid seailumis ja sámi giellalágas meroštallon bálvalusfálaldagas.
– Ohcejoga gieldda olbmot leamašan gaskamearálaččat hui duđavaččat dearvvasvuođaguovddáža vuođđodearvvasvuođafuolahusa (mielde maiddái bátnedoavttir, laboratoria) bálvalusaide, mat bastojuvvojit fállat maid sámegillii nu mo sámi giellaláhka gáibida. Gieldda giliid gaskkat sáhttet leat juoba badjel 150 km. Danin ng. lagašbálvalus dálá dearvvasvuođaguovddážis ja Gáregasnjárgga vuostáváldin leat gieldda olbmuide vealtameahttumat, gielda čállá cealkámušastis.
Ohcejoga gielda lea duđavaš dasa, ahte strategiijas lea máinnašupmi sámegielat bálvalusaid ovddidanbarggus, sámegielat diehtojuohkimis ja doaibmanvugiin, mat gusket buresveadjima ja sámegielat bargoveaga. Gielda goittotge fuopmášahttá, ahte gažaldat ii leat dušše sámegielaid ja kultuvrra vuhtiiváldimis bálvalusaid ordnemis váikkuhanvuođa perspektiivvas, nu mo strategiijai lea dál dulkonvári addi sátnehámi mielde čállojuvvon.
– Gažaldat lea das, mo sámiid lágas ásahuvvon sajádat, kulturiešstivrejupmi, gielalaš ja kultuvrralaš vuoigatvuođat ja
sámegielat bálvalusaid fitnašuvvama dorvvasteapmi váldojuvvojit áššáigullevaččat vuhtii buresveadjinguovllu hálddahusas, bálvalusaid ordnemis ja buvttadeamis.
– Sámegielat veahkadagas leat sámi giellalága mielde sámeguovllus ovttalágan vuoigatvuođat eatnigielat sode-bálvalusaid fitnašuvvamii go suomagielat veahkadagas, gielda deattuha cealkámušastis.
Ohcejoga gielda fálláge buresveadjinguvlui iežas áššedovdamuša sámegielat bálvalusaid ordnema plánemis. Sáhtát lohkat olles cealkámuša dákko.
Lassedieđut:
Taina Pieski
Gielddahoavda, Ohcejoga gielda
050 535 1574
taina.pieski@utsjoki.fi